Wednesday, September 3, 2008

مواقف ..!



* حيرة *

ساعات الواحد بيتحط فى مواقف عجيبه

وبيحتار يتصرف ازاى ؟؟

وبيبقى مشتت ومش عارف يفكر ..

بيقف فى النص

لا عارف يروح يمين

ولا يروح شمال ..

مش عارف انهو اتجاه صح وانهو غلط ؟؟.

يمشي يمين ...يلاقي ناس يقولوا شمال

يمشي شمال ..يلاقى ناس تانيه بتقول لا يمين ..

يفضل واقف فى النص

لا عارف يروح فين ولا ازاى ؟؟

فى الاخر ...

الاسلم اننا نمشي تبع دماغنا ..

زى ماتقولنا نعمل ..

اللى يقتنع بيه عقلنا هو اللى ننفذه..

لا نمشي تبع الناس اليمين

ولا تبع الناس الشمال ..

ولا نحير نفسنا ابدا ..

.......................

*تجاهل *

التجاهل شئ وحش جدا جدا

لو كان من الاصدقاء

او من الاقارب

او حتى فى العمل

لكن لو قضيناها كلها تجاهل فى تجاهل

الدنيا مش هتمشي صح ..

يبقى الاسلم فى الحاله دي ..!!!!

لسه ماوصلتلوش بصراحه

لو حد عنده حل يقوللى عليه ..

.........................

*غيره *

اتنين بيغيروا من بعض ..

عادي يعني بتحصل فى احسن العائلات

بس ياترى ايه السبب فى الغيره دي اللي بينهم ؟؟

ليه شخص يغير من التانى ؟؟

لو لاقيت حد بيغير منك هتعمله ايه ؟؟

هتغيظه بزياده ؟؟ :D

ولا هتتجاهله ..ولا هتقرب منه وتبقى صاحبه ؟؟

ولا هتتصرف معاه ازاى ؟؟

فى اعتقادي الاسلم فى الحاله دي ...

انك تبعد عنه من اساسه ..

وتبعد عن المشاكل اللى هيسببهالك بسبب غيرته دي ..

..................

* فراق *

احيانا كتير جدا جدا جدا

بنبعد عن حاجات بنحبها ..

يا اما اشخاص

يا اما اماكن

يا اما بنفقد حاجات بنحبها ..

لعبه مثلا ..

محفظه .. (ده على اساس انى كنت من هواه جمع المحافظ ..مخكم مايروحش لبعيد)

تتسرق منك مثلا المحفظه وتزعل اوى عليها مش على اللى فيها ..

المهم ..انه لما بنبعد عن اى حاجه ونفارقها سواء بإرادتنا

او غصب عننا ..

لو اتحطينا فى الموقف ده ..

يبقى الاسلم لنا الابتعاد ..

خصوصا لو عن اشخاص اتسموا بالغدر ..

او اماكن اصبحت تسبب لنا ضيقا ..

او بتفكرنا بحاجه مانحبش نفتكرها ..

ولو حاجه ضاعت مننا غصب عنا ..

مانزعلش عليها ..لانه حتما ولابد ..

هيجي الافضل منها ..

وبدل المحفظه اللى ضاعت دي ..

هنجيب واحده جديده .. واشيك ..

.......................

*رد فعل *

عمنا نيوتن قال انه لكل فعل رد فعل

مساو له فى المقدار مضاد له فى الاتجاه ..

بس فى بعض المواقف...والافعال..

ماينفعش يكون لينا رد فعل مضاد ..

يعني لو مثلا واحد شتم واحد فى الشارع ..

والتانى رد عليه ..

مش هنخلص والدنيا هتولع حريقه ..

واحد اتخنق من واحد ومش طايقه ..

ومش قادر يتعامل معاه ..

يبقى الاسلم فى الحكايه دي ..

نفتكر (والكاظمين الغيظ) ..

الدنيا هتتحل .. بهدوووووء ..

مابقولش نكون سلبيين ..

لكن نتعامل بهدوء ..بسياسه..برد فعل فى نفس الاتجاه ..

الدنيا هتمشي .. من غير عصبيه وزرجنه ..

................

* مسؤلية *

احيانا بتشاء الظروف اننا نتحط فى مكان ..

بإرادتنا او غصب عنا ..

ونشيل مسؤليه ..

يمكن نكون قدها ويمكن مانكونش ..

واحيانا تانيه بنوافق نشيل مسؤليه ..

من غير مانعرف هى ايه اصلا ..

بنبقى محتارين ..نكمل ولا مانكملش؟؟..

نقبلها ولا مانقبلهاش ؟؟..

الافضل انه نكمل ونقبل... لو مش قدرنا على المسؤليه ..

ماخسرناش حاجه .. بالعكس تماما ..

هنكتسب خبره .. وهنتعلم اكيد ..

ومش بعيد نلاقينا مع مرور الوقت ..

بنتعلم .. ونبقى قد المسؤليه دي ..

بس المهم .. لو لاقينا انه في ضرر ..

هيقع على غيرنا من القبول ده ..

يبقى قبل مايقع الضرر ..نكون منسحبين ..

ماهو ماينفعش نسيبلهم الدنيا بايظه ونمشي..

....................


* مواقف *

ساعات كتير الواحد بيتحط فى مواقف مايعرفش يخرج منها ..

وبيتحط قصاد حاجات مايعرفش يتصرف فيها ..

ومواقف تانيه بايخه كتير يمر بيها ..

طب الاسلم فى الحاله دي ايه ؟؟

ابعد عن الشر وغنيله ..

او اقفل على نفسك لو مانتش قد الناس والمواقف دي ..




17 comments:

Anonymous said...

التجاهل اسؤا شئ

و عندى انا بيؤدى لفراق

لانى لا اقبله

بوست حلوه اوى

كل سنه و انتى طيبه

و رمضان كريم

سلامات :)

كـــيــــــــارا said...

حيره وغيره وتجاهل

وفراق

انتي اتكتي علي اصعب مايمر بيه الانسان

كل سنه وانتي طيبه

Anonymous said...

««((¯`·«AhMed•3LaM»·´¯))»»


امشي بدماغك
عشان لو وقعت متلومش غير نفسك
وتعمل غيرك شماعه لاخطائك
بتغير من واحد قلده في الصح
واحد بيغير منك حاول تعلمه وتقف جامبه هتلاقيه بيتحول من ناقم عليك
لاقرب الاقراء لك

(( ادفع بالتي هي أحسن فإذا الذي بينك وبينه عداوة كأنه ولي حميم ))

Dr.m said...

السلام عليكم

الحيره مش موجوده لو عرفنا طريقنا صح
والغيره محموده لو وظفناها صح
والمواقف بيبان فيها الرجال
والفراق لا يطيقه من عرف الحب
والتجاهل إما خير وإما شر
و رد فعل ينبغي أن يكون أفضل من الفعل

تقبلي تحياتي على البوست الرائع

كل عام وأنت بخير

سلام

blue-wave said...

ممممممممممم
بوست هايل يا رضوى
بجد تسلم دماغك

ahmed_k said...

أييييه الحكايه ؟؟؟
هو في أيه بالظبط ؟

بنت الأسلام said...

أختى فى اللة رضوى ما شاء اللة التدوينة رائعة وأسلوبك يشد الانتباة ويخليى الواحد عايز يكمل القراءة لحد أخر الموضوع.أشكرك على زيارتك لمدونتى ورأيك فبها.وان شاء اللة أكبر الخط شوية
أدام اللة التواصل بيننا
وكل عام وانتى بخير

radwa said...

MaGn0liA اخ
..........

وحضرتك طيب

الله اكرم

...............

كيارا
.....

تفتكري الحاجات السهله هنتك عليها او هناخد بالنا منها زى الحاجات دي ؟؟

ماعتقدش ..

وانتى طيبه ياجميل ..

radwa said...

اخ احمد
.......

صح كده
امشي بدماغك عشان ماتلومش الا نفسك

متفقه معك ايضا فى ان اللى يغير نحاول نقومه ونقرب له ..
بس مش كلهم بينفع معاهم كده ..

فى ناس الغيره بتعميها
ومابتشوفش حاجه غير انه عاوزة تأذى اللى بتغير منه .. ومهما قرب منه او حاول معاه ..مابيجيش بفايده ..

radwa said...

m دكتور
..........

وعليكم السلام ورحمة الله وبركاته

********
الحيره مش موجوده لو عرفنا طريقنا صح
والغيره محموده لو وظفناها صح
والمواقف بيبان فيها الرجال
والفراق لا يطيقه من عرف الحب
والتجاهل إما خير وإما شر
و رد فعل ينبغي أن يكون أفضل من الفعل
********

رائع رائع رائع
رد اكثر من رائع


كل عام وحضرتك بخير ..

radwa said...

دكتور عمرو
......

منور المدونه يادكتور


............


اخ احمد
....

في ايه ف ايه ؟؟
هو اتوبيس كم بيروح فين ؟؟
:D

radwa said...

همسه
....
نورتى المدونه ده اولا

ثانيا ربنا يكرمك على الاطراء الطيب

ثالثا بقى ان شاء الله يبقى تواضل دائم

اما رابعا وانتى بخير ..

::warda::

وائل مصطفى said...

مواقف حياتيه نمر بها كثيرا
المهم ان لا نتوقف عندها كثيرا

خصوصا اذا احسست بالمرارة

عديها ولا تتوقف

وائل مصطفى said...

صحيح ايه الصورة الغريبه دى يا استاذه رضوى انا حسيت انى دخلت فيلم الصرخه او غرام فى الاوضه الضلمه او حاجه رعب

ليه الخضة دى طيب

radwa said...

بشمهندس وائل

عديها ولا تتوقف ..

اكيد هنعديها بس لازم هنقف عندها شويه .. ..



بخصوص الصوره بقى
حلو الربع ده
ماله
ماهى زى الفل اهو

كنت بدور على صوره زحمه
فيها حاجات كتير
وتكون صوره مضلمه
طلعتى دي
عجبتنى
اسبها
ماينفعش طبعا

:ker:

هبة النيــل said...

ايه البوست الطويل دا يا حجة

بصي هرد على موضوع موضوع

1- الحيرة

قال رسول الله صلى الله عليه وسلم :" استفتِ قلبك وإن أفتوك" " خلصت

يبأه امشي تبع دماغك

وبصراحة والله دماغك أجدع من أي حد

عارفة أبسط حاجة ليه

على الأقل تندمي على اختيار انتي اللي اختارتيه بدل ما تندمي على اختيار "حد" مختارهولك

طيب؟؟

طيب

هجيلك تاني ان شاء الله

استنيني يا قمر

radwa said...

رورو

صح جدا جدا

امشي تبع داغى هلوم نفسي


مستنياكى يا قمره فى الباقى