Saturday, December 13, 2008

حارة زعتر

حارة زعتر

حارة من قلب مصر...صورة من مجتمع إنت عايش فيه ..أو نفسك تعيش فيه...
حارة زعتر بتعكس ملامح مجتمع كامل..مع "المتألقين" هتحس إنك إنسان جديد مش بس عايش لنفسك..لأ..ينابيع الخير في قلبك هتلاقي أكتر من مُتنفس..لما تساعد غيرك هتلاقي نفسك وهتحب المكان أكتر وهتقرر إنك تنضم ليه..هتدخل على بوابة الحارة هتلاقي أصحاب بيتكلموا في اللي نفسك تتكلم فيه..هتلاقيهم في الفرح بيهنوك وفي الألم بيواسوك...
وساعتها..
هتحس إن ده بيتك..
ودي حياتك..
ودول أهلك..
الشيخ مهدي قاعد في زاويته مستنيك وبيستنهض دايما همتك لفهم الدين والتقرب للخالق عز وجل ...والمنتجع التنموي والنفسي عبارة عن مكان ممكن تلقى فيه نفسك وتشكي فيه من همك ...من بيت جدتي هنية وبيت الخاطبة بتنطلق همسة حب بتدفع في نفسك الاحساس بدفء بيت العيلة ورائحة الأكل المضبوط النضيف والنصيحة والكلمة الطيبة...
لو بصيت لشمالك هتلاقي قهوة من غير لا شيشة ولا دخان ..لكن هتلاقي فيها نفس الدردشة ونفس الأحاديث الل ما بتنتهيش وفي ركن منها هتلاقي "لوكلوك أفندي" بيتلامض في كل حاجة وكالعادة مافيش حاجة في البلد عجباه
لو بصيت ليمينك هتلاقي الدكتورة رحمة قاعدة في عيادتها مستنية منك بس تقول آه علشان تقوم لخدمتك ولو بصيت قدامك هتلاقي حيطة كبيييييرة تساعي الكل ممكن ببساطة تخربش عليها إبداعك او ترسم عليها ملامح فنان ساكن جواك...
حارة زعتر فيها الملعب والورشة والسايبر ...
حارة زعتر فيها إنت
وفيها حياتك...
ما تترددش واسكن فيها هتلاقيها سكناك..

حارة زعتر

http://z3tr.arrawan.com/index.php

Sunday, November 23, 2008

بوست في السريع

سلام عليكم

جاية اطل وماشية على طول

جايه اسلم عليكو نفر نفر

ونفرايه نفرايه

بقالي زمن مادونتش

وغالبا نسيت التدوين

بس هى الدنيا كده

تلااااااااااهي

دخلت فيما يسمى بدوامة الحياة

تشيلني وتحطني

وتهبدني وترزعني

عاااااااادي خالص

ده غير اليوم اللى بقى يطير هوا

وبسرعة الصاروخ

بقيت انسى ادخل المدونة

بقيت انسى اكتب فيها

وبقيت أأجل الكتابة والتدوين

زي ما حاجات كتير بتتأجل

يلا ماااا علينا

سلام عليكم بقى

.............





Saturday, October 11, 2008

سُئلت عن الرضا ..وكانت الاجابه

السلام عليكم ورحمة الله وبركاته

سؤال بس ..

ازاى نرضى بنصيبنا ؟؟

يعنى الشعور بالرضا ده نوصله ازاى ؟؟

الحمد لله الحمدلله بحس دايما انى راضيه جدا جدا

وقنوعه جدا جدا جدا ..

لكن لما حد يسألنى انتى ازاى راضيه ؟؟

ازاى بتوصلي نفسك للاحساس ده ؟؟

اقول ايه ؟؟

اشرحها ازاى ؟؟

فى دعاء " اللهم ارضنى وارضى عني "

ودعاء تانى " اللهم اقدر لي الخير حيث كان ثم راضنى به "

طب انا قلت الدعائين دول

فى حاجه تانيه اقولها ؟؟

الرضا جزء من السعاده

وحاجه مهمه اوى فى حياتنا ..

ماهو لو مش رضينا ..هنسخط على كل حاجه حوالينا ..

مش عاوزة اتكلم عن الرضا لأنه اتكلمنا عنه كتير ..

انا عاوزة اعرف اسبابه ..

ازاى نوصله ..

لما حد يسألنى انتى بترضى ازاى اقوله ايه ؟؟

كل اللى بقدر اقوله انه احساس مايتشرحش

ومايتوصفش

ولا حد له رأي تانى ؟؟

ده كان الموضوع اللى نشرته هنا فى حاره زعتر

وكانت الاجابة من الاخوة والاخوات رائعه جدا جدا
وكانت كالأتي:

كانت واحدة حبيبتى تقولى ..

الرضا إننا نستقبل القدر بابتسامة !

أما إزاى نوصل للرضا

بحب الله ..

حبى ربنا أوى حتوصلى للمعنى ده ..

ويكون عندك يقين إن كل أقدار الله عز وجل ليكِ خير ...

والرضا مش بسهولة نوصله ..

مراحله كتير

وكل مرحلة ليها اختبارها ..

وكل متحبى ربنا أكتر كل متقدرى توصلى للمرحلة إللى بعديها ..

وكل مطاعتك لله تزيد كل مصعوبة المرحلة تكون أقل ..

الموضوع محتاج اخلاص وحب وهمة

أرضاكِ الله وجعلكِ من الراضين ..


كل سنة وانتِ طيبة يارورو ..

...

(الاخت نارا)

..............................


كثير من الناس يختط عليهم الأمر بين معنى الرضا ..ومعنى الصبر ..

ليس كل من صبر رضي...
ولكن كل راضي صابر ..

لأن اصبر هو تَحَمُّل ما يقع عليكِِ من أعباء وابتلائات دون التزمر أو الشكوى مما قسمه الله لكِ..

والكثير يستطع أن يكون صابرا

لكن الرضا هو أن
تسعدي بما قسمه الله لكِ..

وشتان بين الإثنين ..
قد تكوني صابرة ولكن لستِ سعيدة ..
لا تفهمين ولا تدركين كيف يكون ابتلائكِ خيرٌ لكِ
لكنك تظلي صامتة صابرة ..ولكن غير راضية ..

الرضا هو كل السعادة
..
السعادة الحقيقة هي إدراك أن الله هو المتحكم بكِ
وأن كل ما يصيبك من خير أو شر(بالنسبة للإنسان) فما هو إلا بحكمة من الله ..

قد يمهلك بها إلى خير كبير ..
ولكن عقل البشر قد لا يدرك هذه الحقيقة التي بها لا يستطع الوصول إلى الرضا..
..
في رأيي الشخصي ان الدعاء هو الحل للوصول إلى الرضا ..((اللهم أرضَ عني ورضِني))
ثم تدريب النفس عليه ...
..
ومن ثم إذا تحليت بالرضا الكامل ..ستتمع بالسعادة الحقيقية الكامنة به ..

لأنك أدركت أن كل ما يصيبك ماهو إلا خير ولكن الله يُسَيِّرَه لك كيف يشاء

لأنه هو أعلم بك منك ..

فإذا لن يأتي لك إلا بكل خير ...

وتعقيبا على تلك الجمله

(كل اللى بقدر اقوله انه احساس مايتشرحش

ومايتوصفش)



لأنكِ به عرفتِ معنى السعادة كما أخبرت من قبل ..
هو ..مفتاح سعادة الإنسان ..
شعور رائع بحق ...

من أعمق الأحاسيس ..
إحساس الرضا بقسمة الله والسعادة بها ..
..
نحن لن نصف الإحساس بذاته ، ولكن..
نصف كيف نصل له ...

وكيف ألبسك الله ثياب الرضا..

ونزع عنكِ ثياب الجهل بحكمة الله في تدبير أمور عباده ..
...
لكِ أن تسترجعي كيف وصلتي هذه المرحلة ومن ثَم تخبري من يسألكِ بها ..



(الاخت فاطمه)

......................

من رضيَ فقد آمن بالوكيل ...

و الرضا ما هو الا رضا عن الله

فمن توكّل على الله فقد أحبّه و رضيَ به موكلا عنه و وثق فيه

و بالتالي فهو يرضى عن كل ما يعطيه .. فكل متوكل راضي..

يعني ...

حب و ايمان ...
توكل ... رضا


رضوى ..

أدام الله عليكِ نعمة الرضا

(دكتوره اسماء)

.................

تتعلمى الرضا ازاي ؟؟؟

ادعي بس ربنا يرضايك ويصبرك على شيء معين وشوفي هيستجاب ازاي وفي سرعة غريبة ...حقيقى الدعاء بالتصبر والرضى سريع الاجابة جدالأن ربنا عارف عبده كويس جدا ...

ثانيا يعود الواحد نفسه على تحمل هموم الحياة بالصبر والصلاة ياعنى جاله خبر وحش مثلا أو حدث حدث مؤلم يبكى ويتألم هو بشر لكن قدامه يعمل أفعال ان عملها أمام الله وربنا شافه بيعمل كده هيعينه ومستحيل ربنا يسيبه من غير مساعدة شديدة منه ...

يصلي يصوم ينذر نذر لربنا ....والقضاء أوقات بيكون مر والله مر جدااااااا

لكن القرآن والصلاة بتكون عاملة زي البلسم صحيح الجروح والألم مبيروحش في وقتها ويمكن ياخد شهور وسنين لكن لازم يكون عنده أمل وكل شيوة يسمع نفسه ان الحال هيتبدل وهيكون للأحسن

عايز تيأس وتتشائم اتشائم لكن برضوا لن يكون الا الي ربنا عايزه

وقدما كل الحكاية بايد الله أولا واخيرا وانت عملت الي عليك كله من دعاء من محاولة للتصبر يبقى خلاص يبقى كل أمر هين ...

جدي ربنا يعافيه من أهل القرآن بيقولى عبارة فهمتهالي الحياة بدرس عملى ...قالي (أول ما يجنى على المرء اجتهاده )

ياعنى

أول حاجة بتجنى على بنى البشر انهم يعتقدوا في الأسباب أكتر من ربنا ....وده شيء رهيب واحنا غالبا الا من رحم ربي خاصة في الأمور الكبيرة بنؤمن بالأسباب أكتر بكتير وده جهل مننا شديد ...وكتير مننا لو قلتله لأ فيه أمل في شيء الناس بتقول عليه سمتحيل قالك ازاي ؟؟؟؟

ازاي ؟؟؟؟

ازاي ايه ؟؟؟

وانت مالك ازاي ؟؟؟

ربك بس الي يجاوب على ازاي ؟؟؟؟

وناس تقول ديه معجزات للأنبياء مش لينا احنا البشر ...وناس تقول وهو ربنا ياعنى هيرحمنى ويفرجلي كربي ليه عملت ايه أنا حلو عشان يساعدنى ....

انت مالك ؟؟؟؟

هو بيحكم في ملكوته

انت ياعبد مالك ....



ثالثا ...على الواحد يجلس مع نفسه ويستعرض كده الماضي هيلاقي ان ربنا عمل معاه مواقف ساعده في الأمور التافهة البسيطة فكيف الحال بأمور تريدها النفس بشدة أو أمور استعصى فيها كل سبيل ...



الحياة علمتنى وشوفتها بتقولى عبارة

متحكميش على قدر ربنا مهما ظهر قاس وصعب ومؤلم انه ده النهاية ....هو حد قالك ان ده نهاية ؟؟؟

النهاية بتيجي بس في حالة رحيلنا عن الدنيا وبالتالى الأمل بيفضل موجود طول ما احنا لسه بنتنفس ....

ربك ما بيسبش الحزن دايم

ومبيسبش القطع دايم

ومش هيسيبك مهما طال الوقت

مهما طال فعلا مش هيسيبك

واذا كان ربنا بيساعدنا في صغائر الأمور هيجي عند كبائر الأمور يسيبك ؟؟؟

وياسلام لما الواحد بيحاول التصبر والرضى ويعدي وقت كبير على قدره وبلائه وتتبدل الحياة من تانى وربنا ينزل عليه الفرج أو ينزل عليه الرضى والاستسلام لقضائه بيحس بلذة وسعادة انه تصبر

ولو متصبرش بيحس بغصه وحزن

أصله مفيش حاجة هتكون الا برضوا الي ربنا أرادها

والدي بيقولى لو تتوكلى على الله فعلا لوثقتى في الي في ايده أكثر من اي سبب

وكم اجتمعت أسباب تقول ان هذا الشيء سيحدث وينتهى من حيث لا ندرى ولا نعلم

وكم غلقت ابواب مينفعش تتفتح أصلا اتقفلت بقفل من الصلب ونلاقيها بتتفتح بطريقة وفي زمان لا على البال ولا على الخاطر

لازم الواحد يقعد مع نفسه ويسمعها ده

ومع الوقت

هيجي اليوم الي تعلمه أزمات الحياة معانى قوية جدا ومهمة


في

(قل لن يصيبنا الا ما كتب الله )

(انا الله على كل شيء قدير )

(هو الذي يحي ويميت )

كفى بنا معرفة ان الله يحي ويمت

يحي من العدم من قبل أن توجد أسباب

ويميت رغم وجود مليون سبب للحياة

يكفى الواحد وقت الشدة يرفع عينه للسماء وربنا يشهد على ما في قلبه من ألم ويقول الأمر أمرك يا صاحب الأمر حكمت في ملكك يارب ولا حاكم سواك ...الأمر أمرك يا صاحب الأمر ....

وأحب أضيف انك يمكن تمر عليك لحظات يأس وتقول لأ الوضع مبيتغيرش ....وتزعل وتضايق وتزداد اكتئاب ...لكن شد من أزرك وحاول الله يرضى بأن تحاول وهو عليه الباقي ....وربنا هيغير الأمور لكن يمكن بعد شهور يمكن بعد سنين ....الثابت انه هيغيرها ولو راضي وبتحاول هيعطيك فوق ما تتخيل سواء عطاء دنيوي أو أخروى ...

ونعم بالله

الدعاء والمحاولة بالتصبر

ونسأل الله أن نكون من الصابرين الراضين لأن ديه أم النعم فعلا فعلا

(دكتوره عبير)

......................

أنا بحس إن الرضا دا "نعمة"

اللهم دمها عليكي


عارفة يا رضوى

واحدة أعرفها

أصغر مني بسنة

متزوجة من حوالي 8 سنوات

من رجل أحبته منذ الصف الثاثل الاعدادي

وأنجبت طفلتها الأولى بعد 9 شهور من زواجها والثانية بعدها بسنتيين

والآن هو بوظيفة مرموقة ويملكون شقة بحي راق جدا بالقاهرة

ولديه سيارة وهي سيارة صغيرة

وصحتهم جميعا بأفضل حال الحمدلله

ولديها هي وحدها بالبنك ما يزيد عن 50 ألف جنيه ماشاء الله

الغريب والذي أثار دهشتي

"شكواها المستمرة"

وعدم رضاها "التاااااااااااااااااااام"

اللهم احفظنا

تعجبت بشدة وقلت لها لديكِ كل ما يجعلكِ سعيدة

سبحان الله

هي لا تشعر بأي رضا


لذا

فعلا الرضا من الداخل وليس له علاقة بمالديك

وكيفية التفكير

رضوى

ربنا يراضيكي ويرضى عنك يا حبيبتي

(دكتوره رواء الروح)

.......................

حاسه ان الرضا شعور نسبى

يعنى في حاجات بنقدر نرضى عنها وحاجات تانيه المفروض مانرضاش عنها

يعنى مثلا في العبادات

نرضى عن عباده معينه عملناها ونحس اننا مبسوطين اننا صلينا ركعيتين قيام ليل مثلا وحسينا اننا قربنا اكتر من ربنا سبحانه وتعالى .. لكن في نفس الوقت يبقى جوانا شعور اننى مش مرتاحه للركعتين دول بس .. نفسى ازود واقرب اكتر ..

اوقات كتير بنقعد نلوم نفسنا عن عدم عملنا لطاعه معينه .. وده بيولد جوانا عدم الاحساس بالرضا ............ واكيد ده مطلوب



اما لو اشياء دنيويه .. مثلا مش راضيه عن شغلى

طب يعنى ايه اللى ممكن تعمليه عشان تحسى بالرضا

لو كان في ايدك حاجه اعمليها وخلاص

خلصتى كل اللى في ايدك .. يبقى انتى كده عملتى اللى عليكى


واوقات بنحس بالرضا من اقل موقف

يعنى مثلا .. قدرت تدخل السرور على طفل صغير بأى حاجه صغيره .. حتى لو ابتسامه .. ده بيخليك تعيش احساس رضا شويه وتقول الحمد الله انه سخرنى لاسعاد الطفل ده ..


يعنى مؤشر الرضا عمال يطلع وينزل طول ما احنا عايشين في حياتنا وبنتعرض لمواقف


اوقات كتير احس ان الايام اللى بنعيشها سيناريو مكتوب لينا واحنا بننفذه

نصحى الصبح نروح الشغل او الكليه او المدرسه او اى حته .......نعمل شويه حاجات في يومنا وبعد كده اليوم بيخلص

تانى يوم بنعيد تقريبا نفس الحاجات مع اختلافات بسيطه

سيناريو احنا ماشيين فيه في حياتنا لحد ماتخلص

كل ميسر لما خلق له

والمفروض اننا الافضل اننا مانبصش لورا ونقول احنا مش راضين عن كذا وكذا ونندم ونعيش مع الماضى اللى عمره ماهيرجع

لكن نعيش مع المستقبل اللى مش عارفين فاضل فيه قد ايه ........ يعنى نحاول نستغل الايام اللى بنعيشها في العمل .. ومانضيعش وقت في الندم .. واللى بنشوفه في يومنا هو اللى مكتوبلنا .. يعنى لو كنا مش راضين اكيد ده مش هيغير في مشيئة ربنا سبحانه وتعالى ..


معادله بسيطه لو قدرنا نحققها هنحس بالرضا طول حياتنا

السعى + الجد والاجتهاد بقدر المستطاع + توكل على الله + احتساب الأجر = سعادة في الدنيا والآخره ان شاء الله


(عابرة سبيل)

.....................

موضوع طيب جدا يا اخت رضوي

عن نفسي بحس إن معني الرضا مرتبط إرتباط وثيق بسكينة و طمانينة القلب
و التي لن تتأتي إلا بقلب ذاق القرب من الله

كلما اقترب العبد من ربه ....كلما رضي بقضائه ..في السراء و الضراء..

حتي لو اجتمعت مصائب الدنيا فوق راسه..

فمع الله كل شئ يهون

الطريق إلي الرضا ....هو القرب من الله و التسليم له

بها يرضي الله عنا و يُرضي بنا

(دكتور سيف الإسلام)

........................

وتعقيبا على (
واعتقد اننا عشان نحس بالرضا اننا مانفكرش في اى نتيجه

يعنى نشتغل من غير ما ننتظر اى عائد مادى او معنوى من شغلى


اتعالج وانا مش منتظر الشفاء

اذاكر من غير مانتظر النجاح)

(من رد الاخت عابره سبيل)

كان الرد عليها :

"أنا عند ظن عبدي بي ..فليظن بي عبدي ماشاء "

لفتت نظري الحتة دي ...

المفروض الواحد يظن بالله كل الخير ويثق تمام الثقة في قسمته

يعنيي لما يبذل قصارى جهده في شئ ما ويتقنه لوجه الله ..
يدرك أن الله هو المُدَبِّر بعد كده

يعني أحنا بنضع البذرة وربنا بينبتها

لكن مش معناه انه يعمل ومينتظرش النجاح

بالعكس
من شروط الدعاء المستجاب انه وانتي بتدعي تثقي ان الله هيجيب دعوتك
وهكذا في عملك

بتعملي وانتي واثقة ان ربنا هينجحك وهيعطيكِ
أما ان حدث غير ذلك فهنا بيظهر الرضا ...

وعلمك الجيد جداً بإن ربنا مأجلك الخير ده لحكمة ما عنده ..

فزي ما قلتي بنتحتسب الأجر عند الله وقتها وبنحوال نتحلى بالرضا ..

(فاطمه)

.......................

ربنا يجازيكى خير يا فاطمه ..

انا قولت الكلام ده على اساس حاجه حسيتها الفتره اللى فاتت

انى مثلا اشتغل واتعب واتقن عملى واحاول احقق اللى نفسى فيه

وفي نفس الوقت مانتظرش شئ بعينه من ربنا سبحانه وتعالى

ولما ما انتظرش بلاقى نتيجة عملى بتيجى لوحدها ...

اكيد طبعا نحسن الظن بالله

نحسن الظن بان اكيد ربنا كاتبلنا الخير ومش هيضيع تعبنا ..

بس بقولها تانى ..

النتيجه نفسها احنا مش عارفين شكلها ايه وجزاء ربنا لينا احنا مش عارفين شكله ايه



بصراحه دى حاجه حسيتها الفتره اللى فاتت في شغلى ..

ومش عارفه اذا كان ده متعارض مع الثقه واليقين بالله عز وجل

لكن في كل الاحوال احنا بنثق بان ربنا عز وجل بيكتبلنا الخير سواء في الدنيا او الاخره طول ما احنا بنتقى الله بقدر المستطاع


(عابره سبيل)
.................................

عجبتني التعليقات والردود جدا وحبيت انقلهالكم

واسمع رأيكم ايضا ..


..


Sunday, October 5, 2008

غير متاح حاليا ..



المدونه التي طلبتها غير متاحه حاليا

المدونه ربما تكون مغلقه

او خارج نطاق الخدمه

يرجى المحاوله فيما بعد

تييييت تييييت تيييييييييت

...


Saturday, September 13, 2008

ومستحيل ياحزن راح تسكن




هكذا قالها منير

ومستحيل يااا حزن رااااااااااح تسكن.!

مختلفه معاه جدا

واعارضه بشده

فإن لم يسكنن الحزن ؟؟

فماذا يسكننا اذاً ؟؟؟

لست متشائمه

ولكن هذا هو الواقع

لايسكننا غير الحزن والالم

وكل شئ مسبب للضيق ..

ربما تمر علينا لحظات من السعاده ..

لكنها سرعان ماتمر

سرعان ماتزول البهجه

وسرعان ماتنقضي اللحظات الحلوة ..

ولا يظل بداخلنا غير الحزن والالم ..









هكذا دوما نعتقد

وهكذا دوما نقول ..

نحن من نجعل الحزن يسكننا

ونجعله يتمكن منا ..

ان شئنا ان نطرده خارجنا ..

سنفعل

ولكننا لا نريد ..

دوما ما اقول ان اردت شيئا بصدق

فسأحققه مهما كان ..

فإن اردنا نحن السعاده

فسنحصل عليها

وان اردنا ترك الحزن وطرده من قلوبنا

فسنفعل ذلك ايضا..

لكن ..ان اردنا نحن فعل ذلك

وبقوة ..

ربما يتمكننا الحزن كثيرا ..

وربما تكون الظروف اقوى واصعب..

لكن لا يجب ان نجعل للحزن مكان بداخلنا

نمر به ..وفقط

اما يسكن داخلنا ..!!

فلا

فلنضيئ شمعة قلوبنا بالسعاده

او بالرضا ..

لو رضينا سنجد انفسنا سعداء ..

فالأصل فى السعاده الرضا ..

فالننحى الحزن جانبا ..

ونبحث عن عوارض واسباب الرضا او السعاده

وتجنب عوارض الحزن ..

ربما تكون ..او غالبا ماتكون عوارض الحزن

شئ مفروض علينا .. لكن

لما نجعل لضيف ثقيل علينا مكان بقلوبنا ؟؟

لما لا نبحث عن علاجه وطرق طرده ؟؟!!

بالتأكيد هناك طرق كثيره

لكن نحن لا نراها ..

وإن بحثنا عنها فحتما سنجدها ..

فحتى متى سنجعل الحزن يتملك منا ..

وبالبطيئ يقتلنا ؟؟!!

فمهما حدث..سأردد دوما ..

ومستحيل ياحزن راح تسكن

ومستحيل ياحزن راح تسكن



Wednesday, September 3, 2008

مواقف ..!



* حيرة *

ساعات الواحد بيتحط فى مواقف عجيبه

وبيحتار يتصرف ازاى ؟؟

وبيبقى مشتت ومش عارف يفكر ..

بيقف فى النص

لا عارف يروح يمين

ولا يروح شمال ..

مش عارف انهو اتجاه صح وانهو غلط ؟؟.

يمشي يمين ...يلاقي ناس يقولوا شمال

يمشي شمال ..يلاقى ناس تانيه بتقول لا يمين ..

يفضل واقف فى النص

لا عارف يروح فين ولا ازاى ؟؟

فى الاخر ...

الاسلم اننا نمشي تبع دماغنا ..

زى ماتقولنا نعمل ..

اللى يقتنع بيه عقلنا هو اللى ننفذه..

لا نمشي تبع الناس اليمين

ولا تبع الناس الشمال ..

ولا نحير نفسنا ابدا ..

.......................

*تجاهل *

التجاهل شئ وحش جدا جدا

لو كان من الاصدقاء

او من الاقارب

او حتى فى العمل

لكن لو قضيناها كلها تجاهل فى تجاهل

الدنيا مش هتمشي صح ..

يبقى الاسلم فى الحاله دي ..!!!!

لسه ماوصلتلوش بصراحه

لو حد عنده حل يقوللى عليه ..

.........................

*غيره *

اتنين بيغيروا من بعض ..

عادي يعني بتحصل فى احسن العائلات

بس ياترى ايه السبب فى الغيره دي اللي بينهم ؟؟

ليه شخص يغير من التانى ؟؟

لو لاقيت حد بيغير منك هتعمله ايه ؟؟

هتغيظه بزياده ؟؟ :D

ولا هتتجاهله ..ولا هتقرب منه وتبقى صاحبه ؟؟

ولا هتتصرف معاه ازاى ؟؟

فى اعتقادي الاسلم فى الحاله دي ...

انك تبعد عنه من اساسه ..

وتبعد عن المشاكل اللى هيسببهالك بسبب غيرته دي ..

..................

* فراق *

احيانا كتير جدا جدا جدا

بنبعد عن حاجات بنحبها ..

يا اما اشخاص

يا اما اماكن

يا اما بنفقد حاجات بنحبها ..

لعبه مثلا ..

محفظه .. (ده على اساس انى كنت من هواه جمع المحافظ ..مخكم مايروحش لبعيد)

تتسرق منك مثلا المحفظه وتزعل اوى عليها مش على اللى فيها ..

المهم ..انه لما بنبعد عن اى حاجه ونفارقها سواء بإرادتنا

او غصب عننا ..

لو اتحطينا فى الموقف ده ..

يبقى الاسلم لنا الابتعاد ..

خصوصا لو عن اشخاص اتسموا بالغدر ..

او اماكن اصبحت تسبب لنا ضيقا ..

او بتفكرنا بحاجه مانحبش نفتكرها ..

ولو حاجه ضاعت مننا غصب عنا ..

مانزعلش عليها ..لانه حتما ولابد ..

هيجي الافضل منها ..

وبدل المحفظه اللى ضاعت دي ..

هنجيب واحده جديده .. واشيك ..

.......................

*رد فعل *

عمنا نيوتن قال انه لكل فعل رد فعل

مساو له فى المقدار مضاد له فى الاتجاه ..

بس فى بعض المواقف...والافعال..

ماينفعش يكون لينا رد فعل مضاد ..

يعني لو مثلا واحد شتم واحد فى الشارع ..

والتانى رد عليه ..

مش هنخلص والدنيا هتولع حريقه ..

واحد اتخنق من واحد ومش طايقه ..

ومش قادر يتعامل معاه ..

يبقى الاسلم فى الحكايه دي ..

نفتكر (والكاظمين الغيظ) ..

الدنيا هتتحل .. بهدوووووء ..

مابقولش نكون سلبيين ..

لكن نتعامل بهدوء ..بسياسه..برد فعل فى نفس الاتجاه ..

الدنيا هتمشي .. من غير عصبيه وزرجنه ..

................

* مسؤلية *

احيانا بتشاء الظروف اننا نتحط فى مكان ..

بإرادتنا او غصب عنا ..

ونشيل مسؤليه ..

يمكن نكون قدها ويمكن مانكونش ..

واحيانا تانيه بنوافق نشيل مسؤليه ..

من غير مانعرف هى ايه اصلا ..

بنبقى محتارين ..نكمل ولا مانكملش؟؟..

نقبلها ولا مانقبلهاش ؟؟..

الافضل انه نكمل ونقبل... لو مش قدرنا على المسؤليه ..

ماخسرناش حاجه .. بالعكس تماما ..

هنكتسب خبره .. وهنتعلم اكيد ..

ومش بعيد نلاقينا مع مرور الوقت ..

بنتعلم .. ونبقى قد المسؤليه دي ..

بس المهم .. لو لاقينا انه في ضرر ..

هيقع على غيرنا من القبول ده ..

يبقى قبل مايقع الضرر ..نكون منسحبين ..

ماهو ماينفعش نسيبلهم الدنيا بايظه ونمشي..

....................


* مواقف *

ساعات كتير الواحد بيتحط فى مواقف مايعرفش يخرج منها ..

وبيتحط قصاد حاجات مايعرفش يتصرف فيها ..

ومواقف تانيه بايخه كتير يمر بيها ..

طب الاسلم فى الحاله دي ايه ؟؟

ابعد عن الشر وغنيله ..

او اقفل على نفسك لو مانتش قد الناس والمواقف دي ..




Tuesday, September 2, 2008

رمضان كريم





كل سنه وانتم طيبين ..
مع انها متأخره شويه ..

رمضان كريم ..
اعاده عليكم بالخير واليمن والبركات..

::warda::




Tuesday, August 12, 2008

اشمعنى موبايلي انا ؟؟؟؟



حاجه تغيظ وربنا
لما تبقى قاعد فى امان الله لابيك ولا عليك
وتلاقى الموبايل بيرن ..بيعلن غضبه بوصول رساله ..
افتح الرساله الاقي بليز كوول مي
مش عاوزة اقولكم الرساله دي بتغطني قد ايه ؟؟
ماعلينا ..المهم يعنى ابص الاقى رقم غريب
ممممممممممم
مين ده بقىىىىىى؟؟
مش هتصل ..مابتصلش بأرقام ماعرفهاش
يطلع فى الاخر حد بيشتغلني ههزئه ..
فأسكت يا لسانى احسن وخليك جوة بوئي
بعد شويه اصابنى الفضول اعرف مين اللى كان عاوزني اتصل ده
بعت رساله محتواها who r u ?
ويارتنى مابعتها ...
بعدها لاقيت التليفون بيرن ..ماردتش
رن تانى ..ماردتش
رن 3 مرات كمان نفضت بصراحه ..
مش هرد بقى والاقى حد عمال يقوللى انتى مين ومش مين ؟؟
ماهو ماكانش المفروض ابعت الرساله اصلا..

بعدها بكتيييييييير الفضول كلنى ..
قلت فبالي ..هشوف مين يمكن حد كان محتاجنى فحاجه
اتصلت لاقيت واحد بيرد ..
سلام عليكم ..ايوه مين حضرتك ؟؟
انتى اللى مين ؟؟
لا بقى ..حضرتك مين ؟؟ حضرتك بعتلي بليز كول مي !!
اه عشان لاقيت رقمك عندي مدينى ميسد كوووول
اناااااااااااااااااااااااا؟؟؟؟؟؟؟؟
ايوة انتى ..
لا بقى حضرتك انا ماعرفش رقمك اساسا عموما حصل خير
تلاقيها رقم غلط ولا حاجه
لا انتى رنتيلي .......
طيب خير قلنا تلاقي رقم غلط ..انا مارنتش على حضرتك اساسا
انا شوفت رقمــــ
تك ..دانا قفلت السكه بكل قلة ذوق

مانا مش هفضل ساعتين افهم فيه اقوله مارنتش يقوللى لا رنيتى ..
ياعم الحج خلاص حصل خير لا رنيتي ..
بعدها بشويه اتصل مرتين تلاته نفضت وماردتش بقى ..
مش سيره هي
بعد شويه لاقيته باعتلى رساله بيقوللى ..
انتى مين يا انسه انا مش بعاكس ..

لاقتني بضحك زى الوش اللى فوق ده وماحدش يسألنى ليه ؟؟
بعدها لاقيته بيتصل تاني ..
يووووووووه وربنا ماهرد ..
الله اعلم بقى ده كان بيعاكس ولا بيهزر ولا فعلا رقمى راح عندو ..
ماعرفش بقى ومش عاوزة اعرف ..

دي المره مش فاكره الكم اللى يحصل معايا الموقف ده ..
فمره تانيه بردو ..والله اكتر من 15 رقم مختلفين يتصلوا بيا وماحدش يرد ..
كان احيانا حد يقول الو ويسكت ..

يعنى انت متصل تسمعنى الو بتاعتك ؟؟
وكلها ارقام ماعرفهاش ..
وعن شرط مش من شبكه واحده ..
فى الاول شكيت انه فى حاجه فى الشبكه ..
ارقام بتتصل بيا يمكن عطل ولا الشبكه بتخرف..
بعد كده العمليه زادت ولاقيت الارقام موبينيل وفودافون ..
يعنى مش عيب شبكه ....!!!!!
وعن شرط تانى انه الارقام متشابهه جددددددددددا ..
بتختلف في رقمين تلاته والباقي شبه بعضه..
بعد كده لاقيت رنه ويقفل..
رنتين ويقفل..
قلت لا بقى مابدهاش ده حد شكله بيهرج
قلت وربنا لاوريه بقى ..
مسكت الموبايل فى ايدي وبقيت مع اول رنه افتح الموبايل واسيبه مفتوح ..
شويه ويقفل ويتصل تانى ..
واعمل نفس الحكايه ..لحد ماخربت بيته فى الرصيد
وبعدها ماتصلش تانى
اخيييييييييييرا خلصت ..
اللى بيدايق انه كل شويه مع الرنات الكتيره دي
حد يسألنى هو مين اللى بيتصل بيكي
وربنا ماعرف
هو مين اللى بيتصل ؟؟
ماعرفش والله
دي كانت اكتر مره خنقتنى ..
ماهو على مدار 3 ساعات وشويه بستقبل تليفونات
من اشخاص مجهولين ..
لازمن ولابد هتخنق طبعا ..

مره تانيه ..قصدي تالته ..
كنت راجعه من اسكندريه لاقيت رقم غريب بيتصل..
رقم بيت مش موبايل..ومحافظه تانيه خالص ..
لاهى قاهره ولا اسكندريه ولا بورسعيد ..
واحنا مالناش حد خارج الحدود دي ..
رديت لاقيت واحد نايم بيرد عليا وقال اسم مش فاكراه ..
قلتله لا النمره غلط ..
قاللى اسف ..وقفلت
اتصل من نفس الرقم تانى ..
يا استاذ الرقم غلط ..
طيب ..وراح قافل..
اتصل مره تانيه ..اديت الموبايل لزوجه اخويه ..
كلمته ..
ايوة انت مين ؟؟
......
وعاوز مين ؟؟؟
.........
لا يافندم النمره غلط ..مافيش حد هنا بالاسم ده ..
تك ..قفلت السكه ..
مره كمان بس من رقم تانى ..
لا بقى مابدهاش ..
احمااااااااااااااااااااااااااااااااااااد
احمد ده اخويه ..قابل انت بقى ..
مش هرد تانى وربنا ..
رد عليه
الو
الو
الو
ماحدش رد
اخويه قفل السكه ..وقاللى لو اتصل تانى هاتى الموبايل ..
اللى يفرررررررس انه اتصل تانى ..
كلمه اخويه تانى ..
ايوة انت مين ..؟
لازم يعنى كل شويه حد يقولك النمره غلط؟؟؟؟
تك ؟..وقفل السكه ..
اللى يغيظ بزياده ..
انه اتصل تانى وانا ماردش ..
عملت الموبايل سايلنت وريحت دماغي

ده غير المواقف التانيه الكتير ..
تلاقى واحد يتتصل ويضرب اى اسم ..
ونقول الرقم غلط ..طب ممكن نتعرف ؟؟

هو في كده ؟؟؟؟؟
ايه التناحه دي ؟؟
وربنا عالم فاضيه ..

اللى يغيظ بقى اكتر واكتر واكتر ..
انه انا الوحيده فى البيت اللى بيتصل بيها ناس ماتعرفهمش ..
ارقام غريبه ..
ناس عاوزة تتعرف وترغي وخلاص ..

اشمعنى انا يا نااااااااااااااااس ؟؟؟!!!!!!!!
كوفر مي اند كراي...!


بقول ابيع الموبايل بقى احسن !!

Wednesday, July 23, 2008

من مذكرات فتاه فى سن العشرين 2

فتحت اجندة مذكراتها وجدت ..!

هتعمل ايه لو نمت يوم وصحيت
ولاقيت
اقرب ماليك فى الدنيا مش حواليك

*********************

مش عاوز بكره يفوت
وانا لسه بموت
والليل عمال يجرح
والوحده تزيد النار
وتزدني مرار
والحزن يبات يصبح


*****************

مش محتاج خضـوع
ولا حـزن ودمــــوع
وحـاجــــات مــؤلـمه
انا محتاج بــــــــراح
وابقى بـ100 جناح
والـمـس السمـا


*********************


بحلـــم وحلـــم بســـــيط
مش كتر مال ولا ســـيط
بحلم اكـــــون نفـسـي ..

********************


وانا وحــدي بمشي ف سكتي
مــوجود بعافـــــر بنتصــــــر
اقع عزيمتى بتنكـســر
اقف واكمل خطوتــــى
الاقي هدفي ف قصتـي
شايف فى اخر الضلمه نوووور

********************



ومستحيل يا حزن رااااااح تسكن..!

*****************


ورا كـل ليـل
في نور جميل
نور فجر يحضنا ضياه

****************

مين اللي ينسى وينسى ايه
دانــا لسه سامـــــع ضحتك
في وداني رنـــــة
شـايفـك بعينـي وبسمتــــك
رايحة وجـايــــه

*****************


جاي من بلادي البعيده
لا زاد ولا ميه
وغربـتــي صاحبتـــي
بتحوم حوااليا

**********************

فقط صور وبعض الكلمات
حتما لها دلالتها
..








Saturday, July 12, 2008

من مذكرات فتاة في سن العشرين



قالت له : مبارك يا حج عقبال بنتك
فقال لها : وفي السماء رزقكم وما توعدون .
*******

قال : احبك
لم تشعر بها وقتها
ولكن بعد مرور شهرين ردت قائله
احبك
وما ادركته بعد عدة شهور ان ليس كل من قال احبك
فهو صادق .
*******

كان من احب الناس الي
لكن شاء الله ان يتوفاه منذ عامين
فرحمة الله على الجميع .
*******

كلما سمعت اسمها منه انتابنى الحزن والفرح معا
الحزن حين اشعر انه ليس لي
والفرح عندما اشعر انه يحبها وسعيد لأقصى درجه
فالسعاده الحقيقيه تكمن في سعاده من نحب .
*******

حينما ضاعت فقدت الامل فى ايجادها مره اخرى
بعد مرور شهر ويزيد ..وجدتها صدفة
تحمل ذكريات وافكار وتطلعات
وربما بعض الاسرار المخفيه
فما ضاع شيئا من مكانه الا وعاد اليه ثانية
ولكني لم اعد ارغب فيها كسابق عهدي.

*******

قد نظن احيانا ان من نعرفهم اصدقاء لنا
وقد نستأمنهم على اسرارنا
ولكن بمرور الوقت نجد اننا اخطأنا
فى وصفهم بأصدقائنا
فلا تأمنن لاحد ابدا .. حتى لو كان صديقا حقا ..
*******

قالت لها في حنق وغضب : اتركيني وارحلي عني الان
فردت قائله : عفوا يا امي
وتسللت الى حجرتها والدموع تملأ عينها
ومن حينها تتمنى الام ان تصبح صديقة لابنتها
لكن لا محاله ..
فرفقا ايتها الامهات ..
*******

دوما ما تفضل الصمت
فكلما سألتها عن سبب حزنها
تجيبينى دموعها اجابات غامضه غير مفهومه.
*******

سألته ذات يوم هل احببتها حقا ؟؟
يجيبنى بهدوء ..هى زوجتى ويصمت
كم اكره الفتور والجفاء فى العلاقات الانسانيه .
******

يقولون عليها ابنة ابيها ..
لحبها الشديد له ولقربها منه
ولكنهم لايرون الحقيقه.
*******

هي صامته تتسم بالهدوء
قليلة الكلام مع الاخرين
لا نرى لها اصدقاء
بمرور الوقت علمنا ان صديقتها هي
وسادتها ..
*******
****
*

Friday, July 11, 2008

دعوة لكافة المدونين


السلام عليكم ورحمه الله وبركاته



ماذا حدث يوم 11 سبتمبر؟




لا اظن ان احدا لا يعرف الاجابة




ج: انه ذكرى الهجوم الذى تم على برجى التجارة العالمى فى الولايات المتحدة




وماذا تعرف عن الهولوكوست ؟




لا اظن ايضا ان احدا لا يعلم ما هى الهولوكوست




ج: المحرقة اليهودية كما يدعى اليهود




ولكن ماذا جرى فى 11 يوليو ؟




لا ادّعى المعرفة




فحتى وقت قريب لم اكن اعلم شيئا عن هذا التاريخ




وكم خجلت من نفسى كثيراً




كيف نذكر _ نحن المسلمون _ ونخلّد ذكرى مآس غيرنا




!!وننسى ذكرى مآساه شعب مسلم




والأكثر ألماً هو ان اغلبنا لا يعلم بمآساته اصلاً




11 يوليو




هو ذكرى مذبحة راح ضحيتها 8 آلاف مسلم ..ويزيد




و 11 يوليو 2008




هى الذكرى الثالثة عشر لتلك المذبحة




التى تعرض لها شعب البوسنة المسلم فى مدينة سربرينيتشا عام 1995م




فأيهما أوّلى بالله عليكم !!




ادعوا كافة المدونين لإحياء ذكرى سربرينيتشا




ادعوا من يهتم لإمر المسلمين..لأنه منهم




ادعوا من يشعر بآلام إخوانه




الا يترك ذكرى سربرينيتشا تمر فى صمت من اليوم بإذن الله




=========


مدونة عن سربرينيتشا


Monday, July 7, 2008

وآل ايه ...حقيبه الكترونيه !!


الحكايه ومافيها انه فى مره وانا فى الطريق مع واحده صاحبتي
وقفتنا واحده بتقولنا ممكن اخد من وقتكم دقيقه ؟؟
اتفضلي ياحجه عشر دقايق بحالهم مش دقيقه واحده
كانت من فريق استطلاع الرأي تقريبا وبتسأل عن امكانيه تبديل الشنطه المدرسيه
بالحقيبه الالكترونيه ..والحقيبه الالكترونيه لمن لا يعرفها عباره عن كمبيوتر صغير
ضد الكسر والصدمات وضد الميه ..ياحلاوة ياولاااد ايشي خيال يا ناس :ker:
المهم يعنى كانت بتسألنا هل ممكن اننا نبدل الشنطه المدرسيه التقيييييله اوي دي
بالحقيبه الالكترونيه الخفيفه خالص دي ؟؟ من باب يعنى تخفيف تقل الشنطه على التلاميذ
مع العلم انه تمن الحقيبه دي 1700 جنيه ..يابلاش ..

طب بالعقل كده ..فى كم مليون فى مصر يادوبك مش معاهم غير اللى يعيشهم
يادوبك بيصرفوا على تعليم اولادهم بالعافيه
ولو عنده طفلين تلاته ..هيقدر يجيب لكل واحد حقيبه الكترونيه ؟؟
حاجه زى الحقيبه دي مشئ هتتناسب مع كل الفئات
مش هتتناسب مع كل المدارس
كان من رأينا انه تتجرب فى المدارس الخاصه والتجريبيه واللغات
لكن مدارس حكوميه ..صعب جدا جدا
صعب تتطبق فيها حكاية الشنطه دي ..
لاسباب تانيه غير حكاية تكلفتها وانه مش كتير هيقدر على تمنها
زى مثلا انه الاطفال مش كلهم بيقدروا يتعاملوا مع الكمبيوتر
مش كلهم فراوده في استخدامه ..
فكان بردو من ضمن كلامنا مع البنت انه الاول يبقى فى حملة توعيه وتثقيفيه
ونعلم الاطفال استخدامات الكمبيوتر قبل مايتطبق النظام ده ..
من رأيي بصراحه ..يمكن هى فكره كويسه ..وممكن تتطبق
لكن صراحه ..شايفه انه هتفشل ..
بعض الناس اصلا مش بيبقى معاهم تمن الكتاب والورق
هيقدروا على حقيبه الكتروينه ؟؟
(وش متغاظ)

اللى يغيظ بقى ..
انه احنا بنيجي عند التافهه ونتصدر ..
يعنى كوووول مشاكل التعليم اتحلت ومش فاضل بس غير ان الشنطه تقيله
وعاوزين نخففها على التلاميذ ونبدلها بالحقيبه الالكترونيه دي ؟؟
ولو حتى الهدف من كده مواكبة العصر والتطورات ونبقى شبه الدول المتقدمه
طب ماهو فى حاجات تانيه اولى ..حاجات تانيه لازم نديها اهتمام اكتر
مش جايين تقولولي حقيبه الكترونيه بدل الشنطه المدرسيه ..
(وش هيفرقع من الغيظ)

انا مش ضد الحكايه دي ..بس بردو مش معاها
لانه ده مش وقتها ..فى حاجات تانيه اهم كتير ..
نشوف الاهم والاولى وبعدين المهم
يعني مثلا نشغل الافراد العاطلين
ونرفع مستوى دخلهم
وبالتالى مش هتبقى عندهم مشكله انهم يجيبوا حقيبه واتنين وسبعه لاولادهم
لكن ماجيش فى دوله مستوى دخل الفرد فيها ولا حاجه
واقولها استخدمي حقيبه الكترونيه ..

ولا ايه ؟؟؟؟
.....