Thursday, November 1, 2007

واستوظفت يا جدعان



سلام عليكم ورحمة الله وبركاته
من غير لا احم ولا دستور
هوب هوب لاقيتهم بيقولولى تعالى استلمى شغلك يوم السبت
بالرغم من انى معارضى عمل المرأه
وان المرأه ممكن تثبت ذاتها ونفسها فى بيتها
بالعكس وهتتفوق فيه اكتر من العمل خارج المنزل
لكن كان حتما ولا بد انى اجرب الحياه العمليه
لسه مخلصة الكورس النهارده
وبردو روحت قدمت ورقى فى الشغل النهارده
وسبحان الله من غير لا احم ولا دستور
حتى من غير مايخدوا الورق
قالولى خلاص تعالى استلمى شغلك يوم السبت ان شاء الله
ولو تحبى تستلميه دلوقتى اتفضلى (:
:ker: :ker:
طبعا ما استلمتوش النهارده
قلت اخدلى النهارده وبكره نوم عشان مافكرش فيه يومين ولا حاجه
ماكنتش متوقعه اطلاقا انى هنزل شغل على طول كده
سبحان الله
ماشيه بالعكس
الناس اللى هتموت وتشتغل بتتعب لحد اما تلاقى شغل
واللى مش فارق معاهم شغل ..
الشغل بيقولهم شوبيك لوبيك
بعيدا عن انى كنت ناوية ادور على شغل
بس مكانش دلوقتى يعنى
كمان حبة كده قدااااااام
لما اظبط ورقى وحاجاتى
ابقى افكر ادور على شغل
لاقيتنى مره واحده
ومن حيث لا ادرى ولا احتسب
جايلى شغل من صاحبتى
تكلمنى امبارح
هاتى ورقك بكره ..بكره اخر يوم فى تقديم الورق
وهتشتغلى زى مانتى عاوزه
هنقعدك على كمبيوتر
فرحت طبعا ونزلت قدمت الورق
بس اتصدمت لما عرفت انه قطاع حكومى ):
مابفضلوش بصراحه
الخاص احلى ..والتعامل مع الناس بيبقى اسهل بكتير
ماعلينا
اهى تجربه والسلام
اول مره احتك بالعالم الخارجى
واحتك بالناس
اما نشوف ايه اللى هيحصل
يا صابت يا خابت
يا اتنين عور d:
ممممممممممم
مش متفائله بصراحه بالشغل ده
مقلقه جدا
يمكن عشان اول مره انزل اشتغل
ماعلينا
بس اهى تجربه والسلام
عل وعسى تضيف لى خبره
فى مجال العمل
او فى مجال التعامل مع البشر
لعله خير بإذن الله
دعواتكم ماسبش الشغل كمان اسبوع
:d :d :d :d
.............................
update

مش قلتلكم مقلقه
ماكملتش اسبوع اهو
نص يوم وسبت الشغل :d
ورجعت عاطل تانى :d


24 comments:

ابو صهيب ( الجمعاوي الاصيل)سابقاً said...

ايه ده انا اول واحد ابارك
كويس والله
اخت رضوى الف الف الف الف الف مبروك على الوظيفة الجديدة وان شاء الله تكون وش السعد عليكي
بس لنتي هتخدينا في دوكة
فين الشربات والدبايح والعزايم بتاعت الشغل ولا هتقولي زي كتير من صحبنا
ان شاء الله مع اول مرتب وبعدين مبنشوفش منهم حاجة خالص
عموما مبروك على الوظيفة
صاحب مدونة ميخا

radwa said...

طيب طيب واحده واحده
ادى الشربات
وادى الدبيحه
وادى العزومه كمان
اى خدمه D:
الله يبارك فى حضرتك
عقبالك (:
دعواتكم

عصفور المدينة said...

بارك الله فيك واستعملك في طاعته

ياسر سليم said...

انا هقول اللى فى نفسى

بس مش بصوت عالى

ربنا يستر على القطاع كله

radwa said...

اخ عصفور:
جزيت خيرا


اخ ياسر :
عود احمد لصفحات الشبكه العنكبوتيه
بأنتظار تدويناتك

القطاع احتمال ينفجر قريبا
طالما اجتمعوا فيه اتنين يعرفوا بعض d:

ربنا يستر

ياسر مدني ...دينامو الإخوان said...

في ذكري وعد بلفور ...لا تنسوا الدعاء لإخوانكم في فلسطين
والدعاء علي الظالمين..واللهم تقبل...وتيقنوا أن الدعاء سلاح مهم لكل المسلمين

وائل مصطفى said...

ربنا يوفقك يا اخت رضوى

امنية said...

ربنا يقوكي يا طنط رضوى
:P
بنتك امنية

مـحـمـد مـفـيـد said...

ربنا يوفقك
:)

radwa said...

بشمهندس وائل
اومنياااااااااا
اخ محمد مفيد

اللهم امين يارب
حتى الان قلبى مقبوض
مش عارفه بصراحه
يللا لعله خير ان شاء الله

جزيتم خيرا

radwa said...

انا بقول انفى الخبر بقى
D:D:D:D:D:

محمود الدوح said...

مبروك الوظيفة

ويارب نتخرج ونشغل بقى

a Dreamer with feet on the Floor said...

I wish U happinedd of Satisfaction ...If with work or without it...and I wish U 2 find Ur way in life..

a Dreamer with feet on the Floor said...

sorry ..I meant happeniss..forgive my keyboard.

Anonymous said...

يا خسارة

radwa said...

اخ محمد الدوح

اخ دريمر

جزاكم الله خيرا

..........

اخ وليد
انا قلت انفى الخبر بقى
:d

هنفى اهوه
اشتغلت يوم واحد فقط لا غير
ورجعت عاطل تانى :d
وياريتنى اشتغلت اساسا
ده انا روحت البشمهندس اللى هيسلمنى الشغل ماجاش
مشيت
قلت مش رايحه تانى
:d

وائل مصطفى said...

حضرتك روحتى لقيتى المهندس مجاش

مأموريه مثلا او اجازة او حتى مزوغ النهاره

تقومى متروحيش تانى

؟؟؟؟؟؟؟؟؟؟؟؟؟

طب كنتى عايزة تشتغلى ليه اصلا

؟؟؟؟؟؟؟؟؟؟؟؟؟؟

عموما ربنا يوفقك فى اى قرار

radwa said...

لالالالالالالالالالالا
مش ده وبس يابشمهندس وائل
الوضع هناك مش مريح بالمره
مش يدعو للتفاؤل اطلاقا
فى حاجات تانيه كمان ماعجبتنيش
غير ان المشوار اساسا صعبون جدا
ده غير ان بابا اساسا شكله وافق انى انزل الشغل ده حلاوة روح
عشان مايبقاش حرمنى من حاجه يعنى d:

فى حاجات تانيه خلتينى اسيبه
اوحساسات كده وحاجات يعنى .............

امنية said...

التغيير حلو برضو
:d

radwa said...

امنيه
:ker: :ker:

تغير ايه يابنتى
انا لحقت
يللا لحمدلله
قدر الله

إيمان الحسيني said...

لا إله إلا الله
ده أنا كنت لسه هامسك التليفون وأتصل أبارك

يلا
قدر الله وما شاء فعل
رزقك هيجيلك لحد عندك

radwa said...

لا يابنتى
اتصلى
بس عشان تباركى على حاجه تانيه
(:

أم حذيفة said...

مبروك يا رودي
الف مبروك حولي بئ تستغلي شغلك دعوه الي الله
ربنا يبارك لك يا حبيبتي

radwa said...

ام حذيفه
نورتى المدونه
الحمدلله كده افضل بكتير
قاعده البيت حلوة والله وممتعه
خصوصوا لو لاقيتى شئ تشغلي نفسك فيه
وشئ مفيد
مش اى حاجه يعنى

دمتى بود
دعواتك (: