Tuesday, August 21, 2007

سلامات ياصحه


السلام عليكم ورحمة الله وبركاته
الاهتمام بالبشر وبالصحة عندنا شئ يفوق الوصف ..
من دلائل الاهتمام بالشعب وصحته
انه واحد يبقى عامل حادثة ومحتاج عملية ضرورى
تمن العمليه والاقامه واتعاب الدكتور والدوا اولا قبل العمليه
والا ......قدامك 4 ساعات وندخله العمليات ..اصلها مش فاضيه
وفى خلال ربع ساعه لو اتوجدت الفلوس ...المريض الوهمى اللى بيعمل العمليه
خرج بالسلامة وعمليته خلصت وخرج من المستشفى كمان
الحكايه دى حصلت لأخويه وكان لازم يتعمل له عمليه فى عينه
اول ما وصل المستشفى الدكتور قاله قدامك 4 ساعات على العمليات
بعدها بربع ساعه كنت وصلت انا ووالدتى للمستشفى ومعانا الفلوس
الحمدلله انها كانت موجوده وقتها لما وصلت الفلوس
اصبح من الممكن انه يدخل العمليات ...
ناس تانيه كان ممكن ماتقدرش على مصاريف العمليه
وبالتالى مصيرهم خلاص اتعرف..

حاجه تانيه
لما يكون فى مريض بفيروس سي ومحتاج علاج
العلاج لمرضى فيروس سي بيكون حقن كل اسبوع لمدة سنه
سعر الحقنه سمعت له 3 اسعار
1200..1400 ..1500 جنيه مصرى فقط لا غير
بأفتراض ان سعر الحقنه هو اقل سعر
مين هيقدر يوفر 4800 جنيه شهريا علاج ؟؟؟
معنى كده انهم بيقولوا لمعظم حاملى هذا المرض ماتتعالجوش
روحوا موتوا احسن لكم
حسبنا الله ونعم الوكيل

3 حالات شفتهم من حاملى المرض ده
واحد عمره لا يتعدى 24 سنه ومش عارف يجيب العلاج
نظرا لأرتفاع سعره المتناهى
والتانى عمره تقريبا 27 سنه الفيروس عنده نشط
يعنى لابد من العلاج سريعا وبردو مش قادر يوفر تمن العلاج
والتالت رجل كبير الى حد ما ونفس المشكله عنده
مش قادر على تمن العلاج
كل حاجه اصبح المقابل لها الفلوس
عاوز تعيش وتتعالج ؟؟...ادفع
مش عاوز ؟؟ ماتدفعش
او بمعنى ادق اللى ماعهوش مايلزموش

اغلب ساكنى جمهورية مصر العربيه اصبحوا حاملين لهذا المرض
وغالبيتهم بردو مش قادرين على مصاريف العلاج
وعشان يتعالجوا على نفقة الدولة ..
يبقى يستنوا تحت رحمة الروتين
اصبح فى عدم اكتراث بأدميتنا
اصبح هناك عدم اهتمام نموت او نعيش مش فارقه
لكم الله يا ابناء مصر

وسلملى على الصحه
..........................
{01} {01} {01}



17 comments:

Sha2loob said...

تصدقي بقى انتي ظلمتي الدولة
أولاً فيه حل تاني غير الفلوس, اسمه العلاج على نفقة الدولة بشرط ان يكون معاكي واسطة.
ايه؟ معاكيش لا فلوس ولا واسطة طيب كده برضه الحكومة معاها حق. البلد دي مينفعش تعيشي فيها منغير واحدة على الأقل من الاتنين, غير كده يا اما تسيبيها وتتطفشي يا اما........
وسلميلي على الصحة

radwa said...

تصدق صح ؟؟
ظلمتها انا ..ظالمة انا ومفتريه وبفترى عليها

العلاج على نفقة الدولة ...يبقى ننتظر طابور طويل عريض
يكون المريض مات واتحلل وشبع موت

يعنى اللى مش معاه ولا فلوس ولا واسطه يهاجر
حل بردو مش بطال

او .... مافهمتش معنى النقط دى

ايامنا الحلوة said...

بعيدا عن الموضوع فى مدونات كدة الواحد لما بيدخلها بيرتاح ليها نفسيا ومدونتك يارضوى شعرت بيها بكدة وإلى الأمام دايما

Anonymous said...

بعيدا عن الموضوع فى مدونات كدة الواحد لما بيدخلها بيرتاح ليها نفسيا ومدونتك يارضوى شعرت بيها بكدة وإلى الأمام دايما

radwa said...

ايامنا الحلوة او الاخ وليد
اخجلتمونا يافندم
نورت المدونه جدا

ahmed mefrh said...

و لسه لما التأمين الطبى يتخصخص
عشانك يا مصر

radwa said...

هو لسه ماتخصخصش ؟؟
قبل مايتخصص هو مخصص لوحده

هاني جابر said...

شارك معنا وانضم الينا في لجنة الدفاع عن سجناء الرأي وحقوق الإنسان
شارك معنا بارسال حدث وتفاصيله لكي نفضح الظالمين ونفضح مهازلهم
انضم إلينا في يالا نفضحهم
www.dahayaa.com

! Eslam ! said...

طيب حتعميلى ايه يا عنى يا رضوى
الكلام مش حيجيب نتيجه
تفتكرى انتى اول واحده اتكلمتى فى المووضوع دة - لا طبعا فى ناس كتيره اووووووى اتكلمت بس حييعمل ايه الكلام عاوزنا فعل مش كلام
الواحد نفسه يسيب البلد اصلا ويشوف مكان الناس فيها تفهمه وتقدر
امكانياته
التأمين الصحى دة فى دكاتره كتير بس بصراحه وشهاده حق
فى ناس عندكم ضمير وفى ناس معندهميش
الحمد الله

radwa said...

طب تفتكر نعمل ايه ؟؟
نعمل مظاهرات امام نقابة الاطباء؟؟
بردو مش هتفيد بشئ
يا اخ اسلام
اى شئ دلوقتى سواء كان قول او فعل مابيجيبش نتيجه
اللى هما عاوزين يمشوه هيمشوه
حسبنا الله ونعم الوكيل

NOHA RADI said...

وسلميلى على الوطن وعلى الأمان وعلى النظافه وعلى الاستقامه وعلى الرزق وعلى الحياه وبالمره على الريس!

ابو صهيب ( الجمعاوي الاصيل)سابقاً said...

تحيا مصر
واحنا مش مهم

radwa said...

d:
وهو لو مش احنا
مصر هتحيا بمين ؟؟

radwa said...

نهى
احم ردك سقط سهوا منى

هسلملك عليهم كلهم ماعدا شئ واحد بس
d:

Ahmed Essawy said...

اللهم اشفي كل مريض...

الطائر الحزين said...

انهم يقتلوننا بالبطىء
لكن احنا نغيظهم و مش بنموت

بارك الله فيك رضوى
بلغك الله رمضان

radwa said...

اخ احمد الصاوى
اللهم امين يارب

...................

الطائر الحزين
ده بيبقى كرم من عند ربنا

كل عام وحضرتك طيب