Monday, July 2, 2007

جالى تاج ..الله المستعان

السلام عليكم
جالى تاج من بشمهندس علاء
نجاوب وامرنا لله
بسم الله
..
..
إنت مين ؟
انا انسان ...له قلب وروح وحس وعقل وكيان
فاضل خطوة على التخرج من كلية التجاره واداره الاعمال قسم الاقتصاد والتجاره الخارجيه
بحب الشعر والهوا واسكندريه
من مواليد اخر سنه 85 ..ومن سكان القاهره
..
..
مين أكتر ست أشخاص بتحبهم ؟
والداى
اخويه اللى قبل منى على طول
صديقتى الانتيم
بنت اخويه
هو
..
..
أنت سعيد ؟
الاجابة على السؤال ده صعبه جدا
مش عارفه بصراحه
مش بحس انى سعيده
بس بحس انى راضيه جدا والحمدلله
..
..
لو اجتمعت أنت و حسني مبارك في غرفة واحدة ؟
هقوله مش كفاياك كده بقى ؟؟
..
..
لو معاك مليون و نص تعمل بيهم ايه ؟
هطلع الاول منهم الصدقه
وبعدين استثمر جزء منهم
وجزء هديه لأخواتى
وجزء هساعد بيه فى جميعة الروان
..
..
بتحب مصر ؟
ايوان طبعا
وجدا كمان
على الرغم انى لى بعض الاعتراضات والتحفظات على بعض الاشياء
لكنها تظل اولا واخيرا مصر
..
..
بتحب البنات ؟
ايوة ..جدا .مش عشان انا منهم
بس انا بحب البنات فعلا
..
..
إنت مسلم ؟
الحمدلله رب العالمين
اللهم ثبتنا
..
..
ليه ؟
طلعت لاقيت نفسى مسلمه ولله الحمد
وعشان بحب الله ورسوله
مش فاهمه بصراجه ليه ليه ؟؟
..
..
مين أكتر شخصية متقدرش تستغنى عنها في حياتك ؟
اخويه اللى قبل منى
..
..
ليه ؟
بحس انه نصى التانى
بنكمل بعض
بنفهم بعض
قريبين جدا لبعض
..
..
إيه أكتر موقف محرج تعرضت له ؟
كنت مع اخويه السابق ذكره بيشترى كوتشى
وانا بحب الكوتشيات جدا ..بحب ابصلها اوى
سرحت وانا بتفرج معاه ..وشفت كوتشى عجبنى جدا
فبقوله على فكره الكوتشى ده حلو جدا وبتكلم معاه
لاقيت واحد تانى اللى واقف واخويه كان راح الناحيه التانيه وانا ولا انا هنا
..
..
و اتصرفت إزاي ؟
احرجت جدا طبعا ..واحده بتكلم واحد ماتعرفوش هتعمل ايه ؟؟
حطيت عينى فى الارض وسيبته ومشيت
..
..
إيه الأمنية اللي بتدعي دايما ربنا يحققها ليك ؟
نفسى اعمل شئ ارفع بيه راية الاسلام والمسلمين
ادرس شئ بحبه
..
..
و اتحققت و لا لسه؟
الاولى لسه
والتانيه فى طريقها للتحقيق ان شاءالله
بالمره كمان نمرر التاج على
........
بشمهندس عياش...ارحم دماغك
حياتنا كلمات

11 comments:

علاء said...

أخيييييييييييييييرا
كتبتي بوست

الاجابات جميلة ماشاء الله
ربنا يوفقك و يباركلك

على فكرة الكوتشي اللي هناك ده جامد
ابيض في كحلي :)
ههههههههههه

radwa said...

واضح ان حضرتك كنت منتظر البوست d:

احيانا بيقولوا لى انى بضعف قدام الكوتشيهات
فبلاش نجيب سيرتها
مدمناها جدا

omar مشروع بطل said...

جميل اوى التاج
بقالنا كتيييييير مش بنقرالك ليه؟؟
لعل المانع خير

اول مرة اشوف بنت مدمنة كوتشيات !!
و مدمنة كوتشيات دى يعنى بتتفرجى بس ولا بتشترى ولا بتشمى ولا ايه بالظبط ؟؟

محمود الدوح said...

هى الكوتشيات وصلت للادمان
انا اعرف دكتور بيعالج ادمان التىشيرتات
لكن الكوتشيات لسة معرفش حد

ردك كان موفق على التاج

ياسر سليم said...

يااااااااااااااااه

أخيرا كتبتى بوست جديد

بس نصوم نصوم ونفطر على بصله

يكون البوست تاج

عايزين الإبداعات

وبالنسبة للتاج فأنا رديت عليه قبل ما تبعتهولى :)

مدونة سبقتك وبعتتلى التاج ورديت عليه

شكراً جداً على تمرريه لي

تحياتى

صاحب المضيفة said...

إجابات جميلة وهادئة ومقنعة

في نوع من السلاسة الرايقة

دمت بخير

عبدالرحمن said...

بوست رائع وفكرة جميلة بس معرفناش اخوكي اشترى الكوتشى ده ولا لا
ومستنى زيارة مدونتي

علاء said...

ده موضوع التجمع ياريت أعرف رأيك

المدوّن خانة

ابو مفراح said...

بوركتم

أُكتب بالرصاص said...

عجيبة حكاية ان واحدة بتحب تتفرج على الكوتشيهات ؟؟

اشمعنى يعني؟

ما علينا

ربنا يكرمك

radwa said...

السلام عليكم
عدت الحمدلله

الاخ مشروع بطل
النت بس كان فاصل عندى بقاله فترة طويله جدا بس الحمدلله عاد مرة اخرى
بالنسبه للكوتشيهات بحب البسها طبعا واتفرج عليها لكن اشمها دى صعبه جدا d:

الاخ محمود الدوح
لا ماهو علاج الكوتشيهات لسه ماوصلش

الاخ ياسر سليم
نفطر على بصله احسن من مانفطرش خالص

صاحب المضيفه
دمت بود

الاخ عبد الرحمن
لا هو ما اشتراش الكوتشى شاف واحد تانى احلى منه شويه

الاخ ابو مفراح
جزاك الله خيرا

اكتب بالرصاص
اشمعنى الكوتشيهات مش عارفه بصراحه
س كل واحد فى شئ يلفت نظره اوى وشد انتباهه ..انا جت معايا فى الكوتشيهات لحد اما ادمنتها