Monday, May 21, 2007

احلق دقنك لا يفتكروك......

تكملة العنوان
ارهابى
يبقى العنوان كامل
احلق دقنك ...لايفتكروك ارهابى
كلمة ممكن نسمعها كتير فى بعض البيوت
مش عارفه بصراحه ده بينم على عدم الالتزام ولا الجهل بيه
مش هقدر افتى واقول ان اللحيه فرض او مش فرض
لكن اى شخص ملتزم بيطلقها
ده مش موضوعنا
موضوعنا علاقة اللحيه بالارهاب
ايه العلاقه بينهم ؟؟؟؟؟
مش لاقيه اى علاقة بصراحة
بس جملة بنسمعها
تلاقى اب او ام بتقول لأبنها لو كانت دقنه طويله شويه
احلق دقنك يابنى لايقبضوا عليك
احلق دقنك لايمسكوك ويفتكروك ارهابى
يابنى مش عارفه مين عمل عملية ايه كان بدقن
ودلوقتى بيقبضوا على كل اللى مربيين دقنهم
لا حول ولا قوة الابالله العلى العظيم
للدرجه دى وصلنا
فين الايمان بالله وبالقضاء والقدر؟؟
راحوا فين ؟؟ طاروا ؟؟ولا ذهبوا مع الريح؟؟
قل لن يصيبنا الا ماكتب الله لنا
لو مكتوب لك يتقبض عليك هيتقبض عليك
بدقن بقى او بنص او من غير خالص
ده قدرك .....ولا ايه ؟؟
حاجه تجيب الضغط والسكر والمراره
طيب العيب فين ؟؟
العيب فى حكومتنا اللى بتشد اى حد فى سكتها ؟؟
ده بدقن هاتوه ..ويبقى مشتبه فيه
ولا فى تفكير الشعب المصرى
ولا فى التزامه وقيمه ؟؟؟



18 comments:

امنية said...

مش هتلحقى تتهنى بالمدونه يا رودى:d

جد بقى:
عامه الناس بتحكم بالمظاهر
والاعلام طبعا لانغفل دورة العظيييييييييم فى رسم الصورة عن الاسلام
حتىاافلام العربى لما يطلعوا ارهابى
يبقى طلع واحد لابس جلبيه قصيره ودقن
حسبى الله ونعم الوكيل بجد
وده طبعا بيأثر على انطباع الناس عنهم
المفروض الاعلام بدل ما يزيد الطين بله
يغير الفكره دى
لنا الله

radwa said...

تفتكرى فعلا مش هلحق اتهنى بيها :d
ياستى خليها على الله
اللى عاوز يعمل حاجه يعملها
نيجى بقى للأعلام بجد ربنا ياخده
فعلا فى الافلام اى ارهابى بيصوروه ملتحى ومقصر وده بيأثر على الناس ويبقى قصادهم اى حد بالمنظر ده يبقى ارهابى
وتيجى الحكومه تصدق الافلام ويبقى بالنسبلها الملتزمين ارهابيين ويجوا الاهل من المنطلق ده يخافوا على ولادهم
بس اللى بقولوا فين وعى الاهالى المفروض يكونوا فاهمين انه ده اتباع لسنه سيدنا محمد صلى الله عليه وسلم ماهوش ارهاب ولا يحزنون
لنا الله فعلا

Anonymous said...

هل لحكومه هى اللى صدقت الاعلام ولا الاعلام هو اللى صدق الحكومه..!

radwa said...

صح فاتتى دى التعبيرات خانتنى
لا طبعا الاعلام هو اللى صدق الحكومه

Gano said...

انا هاعلق على كام جمله من الى حضرتك قولتيهم
اولا
تلاقى اب او ام بتقول لأبنها لو كانت دقنه طويله شويه

ده اثر الاعلام حضرتك
والى بيشوفه ادامهم

عارفه يعنى ايه اخوكى نازل يصلى الفجر
ولا قدر الله مش يطلع تانى
ومش تعرفى هو فين

ولا اى حاجه
شعور فظيع
فتوقعى بقى اب وام بيشوفو ده بعنيهم
الولد عنده يقين بالله ومش خايف
بس قلب الام والاب
فخوفا عليه بيقولو مش يطلقها
بس هو هو اطلقها
على فكره ده كان واحد صاحبى


تانى حاجه
ده بدقن هاتوه ..ويبقى مشتبه فيه

امشكله انها مبقتش مقتصره على بدقن او بلا
اضحك
ماشى انا وصاحبى ده
ومعدين على كمين
حتع معروفه تركبى الميكروباص وتقوليله بعد الكمين او بعد الكمين
يعنى المهم حته معروفه
وهب الكمين وقفهم
طبعا شافو صاحبى
انت يلااااااا
بطاقتك
وبصلى انت كمان ياض
رحت اديته البطاقه
وكان جنبنا راجل بس دقنه بسم الله ماشا الله
راح الظابط بصله
قاله بطاقتك
شوفى الحركه الى جايه ده
راح الشيخ بصله كده وراح مطلع علبه سجاير
واداله سجاره
تصدقى بالله
الظابط مخدش منه حاجه ومشى العربيه

الى يفطسك من الضحك
والله الحكايه ده ادامى
ان علبه الساجير
طبع فيها ملبس

ملبسسسسسس يا رضوى

سجاره واحده وملبس

طبعا انا فطسان من الضحك
راح بصلى قالى يا بنى لازم تاخدهم على اد عقلهم
علشان تقدر تيسر امورك
قالى انا كل فتره اعمل الموضوع ده
وسبحان الله يا رضوى كل مره بيعدى

فهى فى الاول وفى الاخر نصيب

بس قلق الامهات والابهات مش عارف اقول لازم نبقى برده حاسين بيهم ولا اقول المفروض يقتنعوو مش عارف بقى
بس صدقينى
كل لا يصيبنا الا ما كتب الله لنا

تحياتى لكى

Alaa said...

سبحان الله
الموضوع ده كاتب درافت عنه في اجندتي و كنت هاكتبه و حضرتك سبقتي

الموضوع خطير و بالذات في أوساط الملتزمين
أصبح عندهم عداء ضد اللحية
و اول ما الدقن تنبت شعرتين تلاقي الكلام بأه
"الله ينور يا عم الشيخ
انتا نويت تسيب الاخوان و لا ايه
ايه الحلاوة دي .. خدنا على جناحك يا سيدي"

و طبعا دي ظاهرة سيئة جدا
لان ده يعتبر استهزاء بسنة مؤكدة رقاها بعض العلماء للواجبة
هذا غير الاراء التي تتكلم بفرضيتها

ان اكن هناك اجازة بحلقها فانه تجنبا لأمور شديدة قد تقع بسببها أو مضايقيات في دعوة الله ليس إلا
و لكن الاستهزاء بها فهذا أمر سيئ جدا اللهم عافنا

جزاكم الله خيرا على هذا الطرح الشيق و ربنا يباركلك

جمعاوى said...

بعد كل التعليقات القيمة دى
مش لاقى حاجة أقولها
بس بصراحة عرض متميز للموضوع

radwa said...

اخ جانو
كتبت رد طويل عريض وطار
ماعلينا ..نكتب تانى

طب هقولك على حاجه ...لو اخويه مش ملتحى ومانزلش يصلى ..ومقدر له ان يقبض عليه ..هيقبض عليه ..ولا ايه ؟؟؟
كون انه ملتحى دى كانت مجرد سبب للقبض عليه لكنها قدررررر
المفروض الاهل يعرفوا ده ..ويعرفوا انه نصيبه كده ...كده ولا كده كان هيقبض عليه

جامده جدا حكاية الملبس دى ...
حلو انهم يعرفوا يضحكوا عليهم وياخدوهم على قد عقولهم ...

معاك انه لازم نحس بقلق اهالينا
بس فى حاجه اسمها الشرع والسنه
يعنى الملتحى بيطبق السنه
نيجى نقوله ماتطبقهاش عشان مش حد يؤذيك ؟؟
ماينفعش

جانو منور ....!

radwa said...

بشمهندس علاء ..اهلا وسهلا منور :d
بالنسبه للموضوع اعذرنى وسامحنى انى سبقتك

"الموضوع خطير و بالذات في أوساط الملتزمين
أصبح عندهم عداء ضد اللحية"
لفتت نظرى الجمله دى اوى
ازاى ملتزمين وازاى عنده عداء ضد اللحيه ؟؟
معلش حاجه كمان "انتا نويت تسيب الاخوان و لا ايه
ايه الحلاوة دي .. خدنا على جناحك يا سيدي"
"
هو اللى بيطلق لحيته بيسب الاخوان ؟؟
يعنى لو هو اصلا اخوان واطلقها بيسيبها ؟؟

اها الاستهزاء بها طبعا شئ مش حلو خالص
تلاقى فعلا اللى بيطلق لحيته اصحابه لو مش ملتزمين زيه ..بركاتك ياشيخ
وحاجات من دى ...

ان اكن هناك اجازة بحلقها فانه تجنبا لأمور شديدة قد تقع بسببها أو مضايقيات في دعوة الله ليس إلا
معاك فى الجمله دى ...لو تم التعرض لمضايقات شديده ماشى نحلقها
لكن بردو لازم نتمسك بالسنه ولا ايه ؟؟


جزاكم الله خيرا على هذا الطرح الشيق و ربنا يباركلك

جزانا واياكم

radwa said...

اخ جمعاوى
منور المدونه

Alaa said...

للاسف ده واقع
و اكيد هو سوء فهم من البعض
و طبعا حديثي هو عن فئة معينة
و فكرة ان اللي يطلق لحيته يسيب الاخوان محدش قال كده
انما دي سطحية شديدة في الفهم من البعض
و اكيد لابد من التمسك بالسنة
و أنا اتعجب من بعض الاخوان الكبار الذين ذاع صيتهم و لا اهمية لموضوع الامنيات عندهم لانهم معروفون و رغم ذلك يحلقون لحاهم

سلام عليكم

radwa said...

وعليكم السلام ورحمة الله يابشمهندس علاء

السطحيه فى الفهم بتؤدى الى نتائج غير مرغوب فيها
بتوصل اصحابها الى فهم العكس ..الفهم الخاطئ والسطحى للأمور حولهم
اكيد الفئه دى قد تكون قليله
لكنها للأسف موجوده
وكما قلت انه واقع

Anonymous said...

مدونتك حلوة اوى يارضوى
انا شفتها فى الحارة

بصى ياستى
انتى شفتى فيلم مطلع واحد ملتحى ملتزم او مش ارهابى

المشكلة احنا فى دماغنا
مع ان المظهر لا ينم فى كل الاحوال عن الجوهر

بس اطمنى يا رضوى حتى من غير لحية هيتقبض عليهم برضه

سلام

radwa said...

ههههههه
ملتحى مش ملتحى هيتقبض عليه
جامده الجمله دى
بس العين على اكتر على مين ؟؟
مع ان الاسباب بتكون اسباب واهيه جدا
لهم الله

أخـــ مسلمة ـــت said...

البركة في اعلامنا الغير محترم

و افلام الزعيم

حسبنا الله و نعم الوكيل

radwa said...

افلام الزعيم ؟؟
ههههههههههههه
اضحك الله سنك
هما اكيد كان لهم دور فى ذلك
بس احنا فى دماغنا وعقولنا وتفكيرنا المنطقى؟؟
العيب بردو في بعضنا
الا من رحم ربى

Anonymous said...

الفكرة انهم مش معنهدمش ايمان بالقضاء و القدر . الفكرة انهم بياخدوا بالأسباب أكتر م اللزوم .. فالسبب في القبض و الاعتقال هيا اللحية (من وجهة نظرهم) . يبقى تتحلق.

في بداية مشواري أطلقت لحيتي تدريجيا و على استحياء خوفا من فقدان العزيز . و نسيت العزيز عز و جل .. علمت من الأصحاب و الأخوة في المسجد أني سأفقد الأب و الأم و الصديق و القريب . لكن سأربح إن صبرت .. و تحقق الذي كان دوما يحدث و كان متوقع.

مرة.دخلت لجنة انتخابية عشان الانتخابات البرلمانية (انا بانتخب في كله ماعدا انتخابات الرئاسة) و لما خدت البطاقة لقيت رئيس اللجنة بيسألني بصوت عالي (انتا اخواني؟) .. رديت عليه بضحكة عالية .مافهمهاش طبعا لانها هيا دي كانت الرد ، و ماكنتش خايف ارد.لاني أنا مش اخواني ، بس هيا اللحية خلاص بقت علامة للإخوان .. أما جاهل صحيح.

أتمنى ربنا يثبتني و يهديني لإطلاق اللحية بدل التقصير اللي انا مداوم عليه ده.

و حسبنا الله

جزاكم الله خيرا

radwa said...

مممممم
لو سبناها على ربنا
وسلمنا امرنا لله
كل شئ هيكون تمام
الفكره فعلا دلوقتى انه اى حد ملتحى يا اما اخوان يا اما ارهابى يا اما سلفى
ممكن يكون واحد ولا ده ولا ده ولا ده
بس هنقول ايه بقى ؟؟
لنا الله


سلم امرك لله
واطلقها لوجهه الكريم
وبأذن الله لن يصيبك مكروه