Tuesday, August 12, 2008

اشمعنى موبايلي انا ؟؟؟؟



حاجه تغيظ وربنا
لما تبقى قاعد فى امان الله لابيك ولا عليك
وتلاقى الموبايل بيرن ..بيعلن غضبه بوصول رساله ..
افتح الرساله الاقي بليز كوول مي
مش عاوزة اقولكم الرساله دي بتغطني قد ايه ؟؟
ماعلينا ..المهم يعنى ابص الاقى رقم غريب
ممممممممممم
مين ده بقىىىىىى؟؟
مش هتصل ..مابتصلش بأرقام ماعرفهاش
يطلع فى الاخر حد بيشتغلني ههزئه ..
فأسكت يا لسانى احسن وخليك جوة بوئي
بعد شويه اصابنى الفضول اعرف مين اللى كان عاوزني اتصل ده
بعت رساله محتواها who r u ?
ويارتنى مابعتها ...
بعدها لاقيت التليفون بيرن ..ماردتش
رن تانى ..ماردتش
رن 3 مرات كمان نفضت بصراحه ..
مش هرد بقى والاقى حد عمال يقوللى انتى مين ومش مين ؟؟
ماهو ماكانش المفروض ابعت الرساله اصلا..

بعدها بكتيييييييير الفضول كلنى ..
قلت فبالي ..هشوف مين يمكن حد كان محتاجنى فحاجه
اتصلت لاقيت واحد بيرد ..
سلام عليكم ..ايوه مين حضرتك ؟؟
انتى اللى مين ؟؟
لا بقى ..حضرتك مين ؟؟ حضرتك بعتلي بليز كول مي !!
اه عشان لاقيت رقمك عندي مدينى ميسد كوووول
اناااااااااااااااااااااااا؟؟؟؟؟؟؟؟
ايوة انتى ..
لا بقى حضرتك انا ماعرفش رقمك اساسا عموما حصل خير
تلاقيها رقم غلط ولا حاجه
لا انتى رنتيلي .......
طيب خير قلنا تلاقي رقم غلط ..انا مارنتش على حضرتك اساسا
انا شوفت رقمــــ
تك ..دانا قفلت السكه بكل قلة ذوق

مانا مش هفضل ساعتين افهم فيه اقوله مارنتش يقوللى لا رنيتى ..
ياعم الحج خلاص حصل خير لا رنيتي ..
بعدها بشويه اتصل مرتين تلاته نفضت وماردتش بقى ..
مش سيره هي
بعد شويه لاقيته باعتلى رساله بيقوللى ..
انتى مين يا انسه انا مش بعاكس ..

لاقتني بضحك زى الوش اللى فوق ده وماحدش يسألنى ليه ؟؟
بعدها لاقيته بيتصل تاني ..
يووووووووه وربنا ماهرد ..
الله اعلم بقى ده كان بيعاكس ولا بيهزر ولا فعلا رقمى راح عندو ..
ماعرفش بقى ومش عاوزة اعرف ..

دي المره مش فاكره الكم اللى يحصل معايا الموقف ده ..
فمره تانيه بردو ..والله اكتر من 15 رقم مختلفين يتصلوا بيا وماحدش يرد ..
كان احيانا حد يقول الو ويسكت ..

يعنى انت متصل تسمعنى الو بتاعتك ؟؟
وكلها ارقام ماعرفهاش ..
وعن شرط مش من شبكه واحده ..
فى الاول شكيت انه فى حاجه فى الشبكه ..
ارقام بتتصل بيا يمكن عطل ولا الشبكه بتخرف..
بعد كده العمليه زادت ولاقيت الارقام موبينيل وفودافون ..
يعنى مش عيب شبكه ....!!!!!
وعن شرط تانى انه الارقام متشابهه جددددددددددا ..
بتختلف في رقمين تلاته والباقي شبه بعضه..
بعد كده لاقيت رنه ويقفل..
رنتين ويقفل..
قلت لا بقى مابدهاش ده حد شكله بيهرج
قلت وربنا لاوريه بقى ..
مسكت الموبايل فى ايدي وبقيت مع اول رنه افتح الموبايل واسيبه مفتوح ..
شويه ويقفل ويتصل تانى ..
واعمل نفس الحكايه ..لحد ماخربت بيته فى الرصيد
وبعدها ماتصلش تانى
اخيييييييييييرا خلصت ..
اللى بيدايق انه كل شويه مع الرنات الكتيره دي
حد يسألنى هو مين اللى بيتصل بيكي
وربنا ماعرف
هو مين اللى بيتصل ؟؟
ماعرفش والله
دي كانت اكتر مره خنقتنى ..
ماهو على مدار 3 ساعات وشويه بستقبل تليفونات
من اشخاص مجهولين ..
لازمن ولابد هتخنق طبعا ..

مره تانيه ..قصدي تالته ..
كنت راجعه من اسكندريه لاقيت رقم غريب بيتصل..
رقم بيت مش موبايل..ومحافظه تانيه خالص ..
لاهى قاهره ولا اسكندريه ولا بورسعيد ..
واحنا مالناش حد خارج الحدود دي ..
رديت لاقيت واحد نايم بيرد عليا وقال اسم مش فاكراه ..
قلتله لا النمره غلط ..
قاللى اسف ..وقفلت
اتصل من نفس الرقم تانى ..
يا استاذ الرقم غلط ..
طيب ..وراح قافل..
اتصل مره تانيه ..اديت الموبايل لزوجه اخويه ..
كلمته ..
ايوة انت مين ؟؟
......
وعاوز مين ؟؟؟
.........
لا يافندم النمره غلط ..مافيش حد هنا بالاسم ده ..
تك ..قفلت السكه ..
مره كمان بس من رقم تانى ..
لا بقى مابدهاش ..
احمااااااااااااااااااااااااااااااااااااد
احمد ده اخويه ..قابل انت بقى ..
مش هرد تانى وربنا ..
رد عليه
الو
الو
الو
ماحدش رد
اخويه قفل السكه ..وقاللى لو اتصل تانى هاتى الموبايل ..
اللى يفرررررررس انه اتصل تانى ..
كلمه اخويه تانى ..
ايوة انت مين ..؟
لازم يعنى كل شويه حد يقولك النمره غلط؟؟؟؟
تك ؟..وقفل السكه ..
اللى يغيظ بزياده ..
انه اتصل تانى وانا ماردش ..
عملت الموبايل سايلنت وريحت دماغي

ده غير المواقف التانيه الكتير ..
تلاقى واحد يتتصل ويضرب اى اسم ..
ونقول الرقم غلط ..طب ممكن نتعرف ؟؟

هو في كده ؟؟؟؟؟
ايه التناحه دي ؟؟
وربنا عالم فاضيه ..

اللى يغيظ بقى اكتر واكتر واكتر ..
انه انا الوحيده فى البيت اللى بيتصل بيها ناس ماتعرفهمش ..
ارقام غريبه ..
ناس عاوزة تتعرف وترغي وخلاص ..

اشمعنى انا يا نااااااااااااااااس ؟؟؟!!!!!!!!
كوفر مي اند كراي...!


بقول ابيع الموبايل بقى احسن !!

13 comments:

ahmed_k said...

ههههههههههه
أحسن حل تغيري النمره جايز يكون حد ناشر رقمك وعايز يعملك روشه

بس لما تغيريه أديني الرقم الجديد عشان أجربهولك هههههههه

دي ناس فاضيه مورهاش غير التليفون تلعب فيه
أنا ياما ناس رنت علي ولما بطلبهم يقولولي إحنا مطلبنكاش ولا رنينا عليك
ببقى ساعتها حتجن منهم
لغاية أما قررت ان اللي عايزني يكلمني
لا بعبر رنه ولا رساله

وسلاااااااااام

blue-wave said...

ههههههههههههههه
يمكن يا ستى مش بيقدروا يقاوموا جمال صوتك:))
بجد ربنا معاكى
بيعى الموبايل احسن:))

Anonymous said...

blue-wave said...
ههههههههههههههه
يمكن يا ستى مش بيقدروا يقاوموا جمال صوتك
........
كنت هقول كده وربنا ههههههههه
ابقي غيري صوتك وحسسي الي بتكلميه
انك الحج ابراهيم
دمتم :بودن:
ههههههههههه

«((¯`·«•AhMed•3LaM»·´¯))»»

هبة النيـــــل said...

مانت يجميل بعتلو انت مين وبالنجليزي وبتاع

اللي يبعتلك كلمني شكرن كبري

فوجئت بالرسالة دي بردو بتتبعتلي ومن ارقام معرفهاش

وبعدين "رنة" ههههههه

قال يعني هتصل بأه

سيبك منهم

أوا المدونة لذيذة جدا

قرأت فيها كتير خالص

هرد على حاجة حاجة

Nairy said...

عارفة قصة الو يا مركز ؟

قصة قصيرة بتوصف حال نفر من انفار القرية غلبان اوي وشاءت الظروف انه يروح دوار العمدة وهو مش موجود


وفجأة يلاقي نفسه وجها لوجه مع جوهاز التلاااافووون شخصيا ...اللي مفيهوش زراير ارقام نطلبها ...انما فقط سماعة تزعق فيها بعلو صوتك وتقول الو يا مركز .....الحقونا دة حصل كذا او محتاجين كذا.....يعني تلافون للطواريء فقط

الجدع بقى لمس الجسم البارد للسماعة برهبة وخوف جامد....وبشوييييييش رفعها على ودنه ...سمع دوشة غريبة

مش يعرف للتلافون اي استخدام الا جملة واحدة....قالها بشويش ...الو يا مركز ...وعبر عواصف الكهرباء الاستاتيكية ..سمع خروشة ....كررها تاني ...سمع نفس الخروشة وبدأ يفسرها

على صوته اوي

الوووو ياااامااااركااازز

لقى واحد بيزعق ايوه يا قرية كذا عايز ايه؟

من فرحته راح لا اراديا قال

يلعن ابووووووك ياااا مركااااز

وقفل السماعة وجري ع الغيط


اللي يكلمك تاني يا رضوى افتحي عليه قوليله يلعن ابوك يا مركز

:D

Anonymous said...

إذن لستُ وحدي!!!؟؟
أنا خلال الشهر ده حوالي 10 أرقام يتصلوا بيا
اكتشفت منهم رقم
طلع حد قريبي
..
الباقي لسه... جاري البحث...
:)
هاتبع معاهم نفس حركة أفتح عليهم دي
شكلها هتجيب نتيجة
ويحلوا عن سماي :)

Anonymous said...

انا مش فاهمه مالكم
اساسا الي بتحصل معاه المواقف دي المفروض مايردش ولا يبعت مسج من اساسه
ولو رد يبقى هو كمان بيتلكك للي بيتصل بيه
يلا..
الفاضي يعمل قاضي

radwa said...

اخ احمد غيرته قبل ومافيش فايده
مش هغيير تانى بقى

..............
دكتور عمرو
ماقدرش استغنى عن الموبايل للاسف

..............

المهاجر الى الله
حاضر ان شاء الله ازور المدونه

...........

اخ احمد
شاكوش

...........

radwa said...

رواء الدكرور
بتجيلي تليفونات كتيره طب هعمل ايه
قلت يمكن حد عاوزنى ف حاجه مهمه
ايموشن بيشد فى شعره

...........

بنادوووووول
اضحك الله سنك يابنتى
المهر الجايه ابقى اعملها بتاعة الو يامركز
:ker:

............

اخ اسلام ناجح
شكلهم واخدين الموبايلات مقاوله
ربنا يجازيهم بقى

..........
الاخت مجهوله العنوان
قصدي الاسم

هنتلكك لايه حضرتك ؟؟

ماعلينا ياستى
جزاكى الله خير ..

وائل مصطفى said...

مشكله دى

امممممممم

حضرتك غيرى رنه موبيلك

radwa said...

بشمهندس وائل

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

وياترى تغير رنة الموبايل هيجيب نتيجه ؟؟

يخربيت كده

هموت م الضحك

:ker:

وائل مصطفى said...

جربى بس وشوفى النتيجه

لو منفعش ولسه فى معاكسات

اخر حل بقى

فرمتى الميمورى كارت

radwa said...

طب ماغير الميمورى وخلاص

ولا التغيير لحاجه تانيه والفرمطه للمعاكشات

وش بيشد ف شعره