Monday, July 7, 2008

وآل ايه ...حقيبه الكترونيه !!


الحكايه ومافيها انه فى مره وانا فى الطريق مع واحده صاحبتي
وقفتنا واحده بتقولنا ممكن اخد من وقتكم دقيقه ؟؟
اتفضلي ياحجه عشر دقايق بحالهم مش دقيقه واحده
كانت من فريق استطلاع الرأي تقريبا وبتسأل عن امكانيه تبديل الشنطه المدرسيه
بالحقيبه الالكترونيه ..والحقيبه الالكترونيه لمن لا يعرفها عباره عن كمبيوتر صغير
ضد الكسر والصدمات وضد الميه ..ياحلاوة ياولاااد ايشي خيال يا ناس :ker:
المهم يعنى كانت بتسألنا هل ممكن اننا نبدل الشنطه المدرسيه التقيييييله اوي دي
بالحقيبه الالكترونيه الخفيفه خالص دي ؟؟ من باب يعنى تخفيف تقل الشنطه على التلاميذ
مع العلم انه تمن الحقيبه دي 1700 جنيه ..يابلاش ..

طب بالعقل كده ..فى كم مليون فى مصر يادوبك مش معاهم غير اللى يعيشهم
يادوبك بيصرفوا على تعليم اولادهم بالعافيه
ولو عنده طفلين تلاته ..هيقدر يجيب لكل واحد حقيبه الكترونيه ؟؟
حاجه زى الحقيبه دي مشئ هتتناسب مع كل الفئات
مش هتتناسب مع كل المدارس
كان من رأينا انه تتجرب فى المدارس الخاصه والتجريبيه واللغات
لكن مدارس حكوميه ..صعب جدا جدا
صعب تتطبق فيها حكاية الشنطه دي ..
لاسباب تانيه غير حكاية تكلفتها وانه مش كتير هيقدر على تمنها
زى مثلا انه الاطفال مش كلهم بيقدروا يتعاملوا مع الكمبيوتر
مش كلهم فراوده في استخدامه ..
فكان بردو من ضمن كلامنا مع البنت انه الاول يبقى فى حملة توعيه وتثقيفيه
ونعلم الاطفال استخدامات الكمبيوتر قبل مايتطبق النظام ده ..
من رأيي بصراحه ..يمكن هى فكره كويسه ..وممكن تتطبق
لكن صراحه ..شايفه انه هتفشل ..
بعض الناس اصلا مش بيبقى معاهم تمن الكتاب والورق
هيقدروا على حقيبه الكتروينه ؟؟
(وش متغاظ)

اللى يغيظ بقى ..
انه احنا بنيجي عند التافهه ونتصدر ..
يعنى كوووول مشاكل التعليم اتحلت ومش فاضل بس غير ان الشنطه تقيله
وعاوزين نخففها على التلاميذ ونبدلها بالحقيبه الالكترونيه دي ؟؟
ولو حتى الهدف من كده مواكبة العصر والتطورات ونبقى شبه الدول المتقدمه
طب ماهو فى حاجات تانيه اولى ..حاجات تانيه لازم نديها اهتمام اكتر
مش جايين تقولولي حقيبه الكترونيه بدل الشنطه المدرسيه ..
(وش هيفرقع من الغيظ)

انا مش ضد الحكايه دي ..بس بردو مش معاها
لانه ده مش وقتها ..فى حاجات تانيه اهم كتير ..
نشوف الاهم والاولى وبعدين المهم
يعني مثلا نشغل الافراد العاطلين
ونرفع مستوى دخلهم
وبالتالى مش هتبقى عندهم مشكله انهم يجيبوا حقيبه واتنين وسبعه لاولادهم
لكن ماجيش فى دوله مستوى دخل الفرد فيها ولا حاجه
واقولها استخدمي حقيبه الكترونيه ..

ولا ايه ؟؟؟؟
.....

18 comments:

فارس بلا جواد said...

السلام عليكم ورحمة الله وبركاته
بوست هايل
بس احب اقول ان فعلا فى ناس مش حاسه بالناس ولا طريقه معيشتهم
معتقدين ان كل الناس طبقه واحده فى نفس المستوى
مع انه طبعا غير صحيح بالمره
تحياتى

ليكوريكا said...

مش هقول غير ناس فاضيه

هوا الكلبه اساسا بتروح تعمل ايه في المدارس دلوقتي

ده في طلبه في ابتدائي بقت بتروح من غير شنط

محد حاسس بحد

بس عادي كله خير باذن الله

جمعاوى روش طحن said...

شاء ربنا إن يكون تخصصى ف التربية و التعليم


بصى يا أختى

بكل بساطة القائمين على العملية التعليمية ف مصر ليس لديهم رؤية إطلاقا


مما يؤدى بهم الى التخبط

" نحط سنة سته ..لا ..نشيل سنة سته " مثلا يعنى


الوزير يحلم بحلم يبقى عاوز يطبقة بكره

أصلا الهرم التعليمى ف مصر مقلوب


قال حقيبة الكترونية ..قال

A.SAMIR said...

متخيل عيل صغير ريفي لابس هدوم متبهدلة ولا بس شبشب بيت وهو رايح المدرسة
والذباب مغرق وشه
وماسك الحقيبة الالكترونية اللطيفة بتاعته...
الناس دي مش عايشة معانا ولا ايه؟؟
تحيااتي

blue-wave said...

يا بنتى دى ناس دماغها فاضيه مش حاسه بالقهر اللى احنا فيه
ربنا يلطف بينا

17MeD 3L1M said...

الحقيبه الاكترونيه في المدارس ب1700
الحقيبه الاكترونيه
في الكليات هتكون بكام
دا علي اساس انه كتاب ولازم تشتريه

يسرا said...

يالا خلي الشعب يعيش

والله شر البلية ما يضحك
!!!

عصفور المدينة said...

كنت باشوف في القرية الذكية شاحنات عملاقة مكتوب عليها إنها معامل لنشر الثقافة الكمبيوترية
بس دايما كنت باشوفها واقفة نفسي مرة كنت اشوفهم مش موجودين أصلي كان نفسي أركن مكانهم

Dr.m said...

السلام عليكم
حقيبه الكترونيه عشان نريح (التفل) ونخليه (يواقب) العصر.. معلش ده تأثير الغيظ
الناس دي يا إمامخها تخين يا إما بتستهبل (اسف للتعبير) خلاص يعني التعليم بأه زي الفل الا دي بس .. هي الزباله لو اتحطت في كيس نظيف تبقى ايه.. نظيفه؟!والميت لو اتحط في نعش ملوكي هيحيا تاني؟!
التعليم محتاج ننظفه ونحييه الأول وبعدين نفكر في ظهر الواد اللي معدش بيروح المدرسه اساسا.
تحياتي ومعذره على الإطاله و تقبلي مروري الأول
سلام

radwa said...

اخ فارس
.......
وعليكم السلام ورحمة الله وبركاته

هما عاوزين يتطوروا التعليم

عاوزين يواكبوا العصر

بس للأسف بدأوا بدايه غلط ..

مش شايفين المستويات فى البلد عامله ازاى
مش واخدين بالهم انه فى ناس بتشتغل فى الصيف عشان تحصل على مصاريف تعليهم

....!!!!

radwa said...

اخ ليكوريكا
...........

ناس فاضيه

ودماغهم فاضيه

على رأي حضرتك ماحدش بيعتب المدارس اساسا دلوقتى

ولو عتبوها يادوبك ورقه وقل فى جيب البنطلون ودمتم

radwa said...

اخ جمعاوى
.......

كان الله فى العون

اما نشوف بكره هيطلعولنا بإيه تانى

مش بعيد يقولوا انه التعليم من ع النت

حصه رياضيات الساعه سبعتاشر لسنه اولى اعدادى على النت مباشرة

وش هيفرقع من الغيظ

radwa said...

اخ سمير ..
......

لا طبعا

الناس دي مش عايشه معانا

ولا شايفه اللى احنا شايفينه

ولا حاسه بحاجه اصلا

لانهم فى وادي تانى خالص

radwa said...

دكتور بلو ويف
...............

ناس فاضيه ودماغها فاضيه

وبيطلعوا الفضا ده علينا

وش متغاظ

radwa said...

اخ احمد
.....

ايوة ده على اساس انه كتاب ولازم نشتريه

حقيبه الكترونيه بدل الشنطه العاديه

بدل ماتشيل الكتب والكشاكيل فى الشنطه

لا

انت معاك شنطه فيها حاسب الي

وفيها كل حاجه

مش هتحتاج تشترى لا كتب ولا كشاكيل

radwa said...

يسرا
.......

قصدك خلى الشعب يتقهر مش يعيش

radwa said...

اخ عصفور
.........

شاحنات لنشر الثقافه الكمبيوتريه ؟؟

اول مره اسمع عنها بصراحه

radwa said...

دكتور (m)
.........

وعليكم السلام ورحمة الله وبركاته

ناس دماغها فاضيه

مش لاقين حاجه يعملوها

فبيجربوا اى حاجه فينا والسلام