Wednesday, February 20, 2008

ايه اللى ممكن يحصل ؟؟


سلام عليكم

اولا عذرا انى ماردتش على الردود فى البوست السابق
):

صراحة ماليش نفس ادخل المدونه
وماليش نفس اكتب فيها حتى

ومن هنا كان السؤال
تفتكروا ايه اللى ممكن يحصل لو قفلت المدونة خالص ومسحتها
ومش بقى ليها وجود ؟؟

ماعادتش فى كلام يتقال لا من قريب ولا من بعيد
ولا الواحد اصلا بقى له نفس يكتب ويبعبر عن اى شئ ..

بفكر بقالى شويه صغيرين
ايه اللى هيحصل لو مسحت المدونه ؟؟
ايه اللى هيحصل؟؟
ايه اللى هيحصل؟؟
مش لاقيت اجابه ...

اعتقد مش هيحصل حاجه
انا هفضل انا
الناس هيفضلوا هما الناس
اللى بيدونوا هيستمروا فى التدوين
ومش بعيد الاقيهم عملوا زيي
:ker:

ممممممممممممممممممم
اعتقد يعنى الكون مش هيقف
لو شيلتها من على النت
وشيلت الـ DSL كمان
:D

ولا ايه ؟؟؟؟؟؟؟؟.....

13 comments:

جمعاوى said...

لا أظن ان الموضوع يحسب هكذا

يمر الغنسان دائما بفترات يكون التفكير فيها شبه مشوش

ولكن لا يجب الإستسلام

بل التريث

Sha2loob said...

يمكن متفرقش معاكي
بس صدقيني هتفرق كتير مع واحد زيي بيفرح جداً لما يعرف ان فيه حاجة حلوة لسه في الدنيا
وأكيد في زيي كتيييييير

فهمان ولا مو فهمان

radwa said...

اخ جمعاوى
............
ده مش استسلام
بس احيانا الواحد بيحس انه بيعمل حاجه مالهاش لازمه
او بيزهق من حاجه
ومابيحبش يرجعلها تانى
يمكن الفكر مشوش فعلا
بس فعلا فى حالة زهق من التدوين
مابقاش فى كلام يتقال
..

radwa said...

اخ شقلوب
..........

فهمان ان شاء الله
:D

جزاك الله خيرا ..

إيمان الحسيني said...

شكلك كده عاوزة يترش على وشك ميه صاقعة
تفتكري إنك ممكن تلاقي مُتنفس عن أفكارك في حتة تانية ؟!!!!
أنا فكرت قبل كده ألغي مدونتي
بس وقعت في حيرة
لما أعوز أعبر عن مشاعري وأكلم نفسي زي المجانين ... هاتكلم فين ؟

radwa said...

يا طعمه
ماهو اصلا ماعدش فيه كلام يتقال
حتى لما بقيت احب اخرج اللى جوايا مابعرفش
بقى يرفض انه يخرج

تعرفى انك لما تكلمى نفسك
افضل بكتير من انك تكتبي مشاعرك دي ؟؟
من وقت للتانى هتشوفى اللى انتى كاتباه
وهتكتئبي لما تفتكري
طب وليه
انا اكلم نفسي احسن
واخرج اللى جوايا وارميه فى اى مكان
غير انى اكتبه
الكتابه بتجيب اكتئاب على اكتئاب
وهى مابقاتش ناقصه
......

إيمان الحسيني said...

بس الكتابة أأمن من كلام النفس
أنا إيش عرفني مين يكون بيراقبني ويروح يبلغ عني في العباسية ؟
يبقى أكتب أحسن وأهو كلام للنفس بس بطريقة متغطية
تحبي أحجزلك جناح جنبي ؟
:D
ونجيب أمنبة معانا
وأم البنات تيجي تزورنا وتحدفنا بالسوداني
ههههههههههههههههههههه

radwa said...

اضحك الله سنك يا طعمه

يابنتى والله الكتابه مؤذيه
تخيلي ..كنت مذكراتى
وكنت من وقت للتانى ابص فيها واعكنن عليا
ماهو التدوين بردو كذلك ..
شبه المذكرات الى حد ما

بقولك ايه
احجزيلي جناح جنبك
انا وامنيه هنقعد مع بعض فى جناح واحد
بلاش تبذير وكل واحده تقعد فى جناح لوحدها

:ker:

إيمان الحسيني said...

ماهو لو انتي وأمنية قعدتوا في جناح واحد هتتفقوا عليا
وأمنية عقلها إجرامي وليها سوابق كسفاح قديم ومخضرم
يبقى لازم أفرق بينكم وتكون أوضتي في النص بينكم

(نظرة شيطانية)

Abdallah Hosni said...

السلام عليكم

أول زيارة وان شاء نتواصل

انا بصراحة مستغرب من نقطة ان مافيش حاجة تتقال !!!!!!

هو اه مش هايحصل حاجة بالنسبة لحضرتك لكن أظن انها هاتفرق مع الاخرين وعلا الموضوع مابتقاسش كده زى ماقال جمعاوى

Ahmed Essawy said...

لا تلغيها ولا حاجه ...
الواحد كل فترة بيحس بحاله حنين للمدونه بتاعتو و بيرجع يعبر بيها عن حاجه جواه
...
خليها انت مش خسرانه حاجه ... تنفع وقت عوزه ...
و غير كدا ... انتي بكلامك دا حتقطعي علاقتك بكل الي عرفتيهم علي البلوج
..

radwa said...

اخ عبد الله حسني
وعليكم السلام
فعلا مافيش حاجه تتقال
بقالى زمن فى النت
وقلت تقريبا كل اللى فى نفسي
حاسه انه لو قلت كلام تانى هيبقى مكرر


اخ احمد عسوي
فعلا بحس بحنين ليها
بس بردو مش بلاقي حاجه اكتبها

Ahmed Mohamed said...

بصي بصي بصي هاقولك علي حاجه
لا انتي بتكتبي عشاني ولا عشان غيري ولا عشان كل الناس الي ردت علي موضوعك انتي بتكتبي عشان عايزه تكتبي
ملكيش نفس دلوقتي هيكون ليكي نفس بعدين
عادي يعني