Thursday, December 6, 2007

لحد امتى هنفضل كده ؟؟


سلام عليكم
بجد حاجه تغيظ وترفع الضغط ..لحد امتى هنفضل كده ؟؟
المصالح الحكوميه لحد دلوقتى بما فيهم الجامعات مايعرفوش يعنى ايه كمبيوتر
مايعرفوش يعنى ايه داتا بيز ومعلومات واكسيس واكسيل
حاجه تغيظ والله....
لما روحت اطلع شهادة التخرج بتاعتى طلبوامنى وصل المصاريف بتاع سنه اولى
عشان يتأكدوا انى دفعت المصاريف كامله
المهم ماكانش معايا الوصل ...
واللى كانت بتطلعلى الشهاده قالت لى
اطلعى الدور اللى فوقينا نفس الاوضه اللى فوقينا بردو :D
هتلاقى سجلات ..دورى على سجل 2003 -2004
هتلاقى اسمك فيهم ..هاتى بياناتك منه وتعالى ..(:
المهم طلعت لاقيت واحده قاعده قلتلها عاوزة اطلع الشهاده
و وووو وحكيتلها اللى حصل اللى تحت مع الموظفه اللى تحت
قالت لى عندك سجلات كتير هناك ..دورى على السجل اللى انتى عاوزاة
وما ادراكم والبحث عن السجل ...حاجه بجد تخنق
مطلوب منى ادور على سجل فى وسط سجلات منعكشه
مش مرصوصه ومترتبه .. ولا حتى السنوات مكتوبه عليها من الجنب
مكتوبه على وش السجل
وبقى مطلوب منى ابص فى كل السجلات وادور على التاريخ
المشكله مش فى انى ادور على السجل
المشكله ان السجلات مش محطوطه فى رف مثلا ومترتبه
دى محطوطه على مكتب وبردو مش متربته
الفين وخمسه تحت الفين وسبعه وفوقيه الفين واتنين
وحاجه كده زى الفل يعنى ...
المهم خلصنا من رحلة البحث عن السجل المطلوب
مش بقى فاضل غير انى ادور على اسمى ..
تخيلوا معايا كده ..سجل طويل عريض
مطلوب منى ادور فيه على اسمى واطلعه
تخيلوا حد هيدور على اسم فى سجل دفعته وكلية تجاره
متخيلين العدد طبعا .. ماهى اصلها كلية الشعب ..
المهم مسكت السجل وقلت بسم الله
كان معايا قريبتى ..قلنا انجازا للوقت
هدور انا فى الصفحه من فوق وهى تدور من تحت
وكمان بندور واحنا واقفين ..
فضلنا كتير بندور على اسمي ...لحد اما الحمدلله لاقيناه
بعد اما ضهرنا اتقطم ورقبتنا اتلوحت ..
والله حسيت انى دوخت من الوقفه والبحث عن اسمي
كل ده عشان اطلع الشهاده ...
اخدت البيانات اللى جنب اسمى ونزلت بيها تحت
للموظفه الاولانيه ..وبعد كده كل شئ مشي تمام
ولله الحمد والمن والفضل ...
اللى غايظنى فعلا ..ليه مايكونش فى جهاز كمبيوتر تتحط عليه البيانات دى ؟؟
لحد امتى هنفضل كده ؟؟
هنفضل نتعامل بطرق قديمة ومتعبه ..
مش للطلبه بس ..وللموظفين كمان
تخيلوا كده لو كان فى كذا طالب وطالبه من نفس الدفعه
وفى نفس اليوم ..عاوزين يطلعوا شهاداتهم؟؟
كانوا هيوقفونا طوابير ؟؟
وواحد واحد يدور على اسمه ؟؟
ماعتقدش ..موظفين الحكومه خلقهم ضيق
مش بعيد يمشونا ويقولولنا تعالوا بكره ..
او ياخدوا عدد معين والباقى بالسلامه ..
لو كان فى الاختراع اللى بيدعى كمبيوتر ده
كان هيوفر علينا حاجات كتير ومجهود اكتر ..
لكن نقول ايه بقى ؟؟
هنفضل طول عمرنا كده .. متأخرين ..
وطالع عينينا ..
اما نشوف اخرتها
.............................




21 comments:

مـحـمـد مـفـيـد said...

فلا تتعجب
انت في مصر بلد العجائب

ام البنات said...

رضوى
لو حاطوا الكومبيوتر هيستغنوا عن 10
موظفين
خللى الناس تشتغل
والكومبيوتر اهو عندك بتدونى منه
يا رضوى
هو فى ايه يا صغيرتى صح
مش تكبرى دماغك بدل ما تحرقى فى دمك
ان شاء الله فرجه قريب

عصفور المدينة said...

انتي عارفة انا شخصيا في حالتك النفسية دي بقالي كام سنة 21 سنة
يعني تجلدي عشان تعرفي تكملي

radwa said...

اخ محمد مفيد
............
حقيقة انا تعجبت جدا ..):
ماتوقعتش كده..كده عارفه ان اسمي مش هيطلع من على كمبيوتر
بس ماكنتش اعرف انى هتعب على ما اطلعه كده ):

radwa said...

امى الغاليه
..........
ماهو يامامتى هيحطوا كذا جهاز كمبيوتر
وهيقعدوا عليهم موظفين بردو ..
هتبقى اسهال لينا وليهم ..

ماشي يامامتى هكبر دماغى ومش هحرق دمى
خلاص الحمدلله خرجت منها ..الله يكون فى عون اللى لسه داخلين ..

عارفه كمان يا مامتى ..والله الدفعات الجديده غلابه جدا
المصاريف فى الجامعه زادت ..وكان اللي بيرسب فى ماده ويمتحنها مع مواد السنه الجديده
كان لحد السنه اللى فاتت بيدفع 25 جنيه
السنه بقدرة قادر وصلت لـ 50 جنيه
وربي انا صُدمت لما عرفت ..
ده غير الكتب فى كليتنا بردو غليت
كنت بجيب كتاب لزميلتى وانا هناك ..عامله حسابى ان الكتاب هيبقى زى ما جبناهم السنه اللى فاتت بـ 18 جنيه
وانا بجيبه لاقيت الموظفه اللى بتديهولى
بتقوللى 22 جنيه
قلت فى بالى يمكن فى تطبيقات للكتاب ..
لكن لاقيت الكتاب لوحده من غير ولا تطبيقات ولا بتاع
حاجه تغيظ وتحرق الدم ولا لا ..؟؟
فى سنه اولى وتانيه كنت بجيب الكتب بـ 15 او 16 جنيه
وفى تالته ورابعه بـ18 جنيه
السنه دى اذ فجأة بقى الكتاب بـ 22 جنيه
بعيدا انه مش كتير بالنسبه للكليات التانيه
بس لازم يراعوا انه فى ناس ممكن ماتقدرش تجيب الكتب بالسعر ده
وبعدين اساسا يغلوها لييييييييييييييييه..؟؟
والله دمى اتحرق واتعصبت فى اليوم ده ..
الحمدلله ..

ربنا يهونها على الدفعات الجديده ..

radwa said...

اخ عصفور المدينه
................

يااااااااه 21 سنه بالحاله دى ..؟؟
كان الله فى العون
ادينا بنحاول على قد مانقدر نتحمل اللى بيحصلنا ..

الله المستعان

الحــــــــرية said...

احنا حنفضل مده يارضوى لحد مالشعب ده يبطل خوف وجبن ويبطل كلمة انا مالى خلينى فى حال ويمشى جمب الحيط لو اتخلينا عن ده كله صدقينى حنبقى احسن بكتير وحاجات كتير حتتغير

تحياتى ليكى

soso said...

رضوى علشان تبقى ذكرى كويسة للمتخرجين
نرفع شعار لا للكمبيوتر
ونعم للاعتماد على النفس
ياحبيبتى دة بيبقى حبة رخامة مش اكتر

الحــــــــرية said...

http://al7orya.blogspot.com/ شارك فى حملة التوقيع الحرية للمدون احمد محسن

radwa said...

سوسو
هى ايه دى اللى تبقى ذكرى كويسه
تخيلى لما احكى لحد اللى حصل ده
هيكره يدخل الجامعه دى

وبعدين كل دى رخامه ؟؟
)):

radwa said...

الحريه ..عفوا ردك سقط منى سهوا

تفتكرى ان الشعب هيبطل خوف وجبن ومشي جنب الحيط ؟؟

ماظنش
):

جمعاوى روش طحن said...

إبتسم أنت الآن ف مصر

Dr-Online said...

علي فكرة مصر عمرها ما هتستخدم الكمبيوتر ابدا
وكدة احسن عارفة لية
لان لو حطوا كمبيوتر هنروح تعمل حاجة هيقولوا الكمبيوتر عطلان
يا جماعة الحكومة الالكترونية اتطبقت في جميع انحاء العالم الا في مصر مش عارف لية
الناس دايما بتجبيب الحاجة علشان تتقدم بيها واحنا بنجيبها تعطلنا

شكرا علي بوستك الحميل
وعايزك متحرقيش دمك لانه علي كدة هيتحرق من كدة حاجة

اخيرا احب اهنيكي علي ملكيه مدونة كهذة المدونة الشبقة المنوعة الهادفة
مع ان هذه اول زيارة لي لكني لمحت فيها الهدوء ولها طابع خاص اكيد مش غريب علي ذوق صاحبتها الجميل
واتمني ان اتشرف ولو بزيارة او تعليق لك في مدونتي المتواضعة
(الصيدلي المطحون)

إخوانى مخربش said...

كمبيوتر
داتا بيز
اكسس واكسل
ناقص اوراكل كمان

طيب ما الهيئة المركزية للشئون الصيدلية فيها اجهزة كمبوتر
ومتسجل عليها كل حاجة

حد كده يحاول يروح يعمل حاجة هناك وهتشوفوا العقد اللى ممكن يعملها الموضفين حتى فى وجود الكمبيوتر

محمد عبدالجليل said...

احنا عندنا بقي في الكلية الاوضة الي فيها السجلات حصل فيها حريقة وطلبوا مننا ورقنا تاني

radwa said...

عذرا للتأخير فى الرد ...(:

اخ جمعاوى
..........
لحد امتى هنفضل نبتسم اننا فيها ؟؟
):

radwa said...

دكتور اون لاين
...........
نورت المدونه (:

المشكله فى الحكومه الالكترونيه مش فى الالكترونيه
فى الحكومه نفسها D:
اقصد يعنى فى العقول اللى بتشتغل
لو فعلا بيراعوا ضميرهم الحكومه الالكترونيه هتطبق بشكل جيد ..
بس نقول ايه بقى
لنا الله


جزاكم الله كل الخير على الاطراء ..
(:

radwa said...

اخ اخوانى مخربش
...........
ماحنا قلنا ان العيب مش فى الحكومه الالكترونيه
العيب فى كيفية استخدامها من قبل الموظفين

..............

radwa said...

اخ محمد عبد الجليل
.................
كون انهم يطلبوا الورق تانى مش مشكله
ده ظرف وحصل مالهومش فيه
اللى يغيظ فعلا ان يكون الورق موجود ويطلبوا غيره عشان مكسلين يدوروا عليه ..

لما روحت اطلع شهادتى ماتوقعتش انى هدور فى سجل طويل عريض
المفروض البيانات دى عندهم وهما عارفين طريقها وترتيبها

يللا خير ..الحمدلله اننا طلعنا منها سلام
D:

radwa said...

دكتور اون لاين
.................
كل اما ادخل مدونة حضرتك الصفحة تهنج
):

DR.HAMAS said...

شئ طبيعى

فى بلد

لا يحكمها

شرع

خالقها

فلا داعى للعجب