سلامات ياصحه

السلام عليكم ورحمة الله وبركاته
الاهتمام بالبشر وبالصحة عندنا شئ يفوق الوصف ..
من دلائل الاهتمام بالشعب وصحته
انه واحد يبقى عامل حادثة ومحتاج عملية ضرورى
تمن العمليه والاقامه واتعاب الدكتور والدوا اولا قبل العمليه
والا ......قدامك 4 ساعات وندخله العمليات ..اصلها مش فاضيه
وفى خلال ربع ساعه لو اتوجدت الفلوس ...المريض الوهمى اللى بيعمل العمليه
خرج بالسلامة وعمليته خلصت وخرج من المستشفى كمان
الحكايه دى حصلت لأخويه وكان لازم يتعمل له عمليه فى عينه
اول ما وصل المستشفى الدكتور قاله قدامك 4 ساعات على العمليات
بعدها بربع ساعه كنت وصلت انا ووالدتى للمستشفى ومعانا الفلوس
الحمدلله انها كانت موجوده وقتها لما وصلت الفلوس
اصبح من الممكن انه يدخل العمليات ...
ناس تانيه كان ممكن ماتقدرش على مصاريف العمليه
وبالتالى مصيرهم خلاص اتعرف..

حاجه تانيه
لما يكون فى مريض بفيروس سي ومحتاج علاج
العلاج لمرضى فيروس سي بيكون حقن كل اسبوع لمدة سنه
سعر الحقنه سمعت له 3 اسعار
1200..1400 ..1500 جنيه مصرى فقط لا غير
بأفتراض ان سعر الحقنه هو اقل سعر
مين هيقدر يوفر 4800 جنيه شهريا علاج ؟؟؟
معنى كده انهم بيقولوا لمعظم حاملى هذا المرض ماتتعالجوش
روحوا موتوا احسن لكم
حسبنا الله ونعم الوكيل

3 حالات شفتهم من حاملى المرض ده
واحد عمره لا يتعدى 24 سنه ومش عارف يجيب العلاج
نظرا لأرتفاع سعره المتناهى
والتانى عمره تقريبا 27 سنه الفيروس عنده نشط
يعنى لابد من العلاج سريعا وبردو مش قادر يوفر تمن العلاج
والتالت رجل كبير الى حد ما ونفس المشكله عنده
مش قادر على تمن العلاج
كل حاجه اصبح المقابل لها الفلوس
عاوز تعيش وتتعالج ؟؟...ادفع
مش عاوز ؟؟ ماتدفعش
او بمعنى ادق اللى ماعهوش مايلزموش

اغلب ساكنى جمهورية مصر العربيه اصبحوا حاملين لهذا المرض
وغالبيتهم بردو مش قادرين على مصاريف العلاج
وعشان يتعالجوا على نفقة الدولة ..
يبقى يستنوا تحت رحمة الروتين
اصبح فى عدم اكتراث بأدميتنا
اصبح هناك عدم اهتمام نموت او نعيش مش فارقه
لكم الله يا ابناء مصر

وسلملى على الصحه
..........................
{01} {01} {01}

دى لاباظت ولا خربت

السلام عليكم ورحمة الله

تتر لمسلسل مش فاكره اسمه ايه كان بيقول
دى لا باظت ولا خربت ..ولا جابت جاز لاموأخذه..دى عيشة ظريفة جدا
ولا بيتنا اتخرب ..ولا حد بيشتكى لحظه ..ماشية والقاشيه معدن
عايشين بحريه زمن القيود اختفى اتحدى لو واحد يوم انضرب بالقفا
والناس بتختشى ولا حد بيرتشي...الله على الحياة بقى لونها شفتشي
ده احنا لا صوتنا اتنبح ولا فى مالطه بندن

ده الجزء الاولانى
دى لا باظت ولا خربت :هى فعلا كل حاجه سليمة وماشية تمام التمام
مافيش بوظان ولا خراب فى البلد ولا اى شئ
ولا جابت جاز : الناس ماتعبوش وماجبوش جاز لسه هما يادوب بس فرفروا
دى عيشه ظريفة جدا: عيشة حلوة وفل الفل الحمدلله
ولا حد بيشتكى لحظه:الناس عايشة تمام التمام هيشتكوا من ايه يعنى
يستاهلوا الحرق لو اشتكوا
ماشية والقاشية معدن : ماعندناش بطاله ..ماعندناش عماله زايده ومش عارفين نوظفها ..ماعندناش كم الف خريج كل سنه مش لاقى شغل وبيقعد على القهوه او على الرصيف او فى الاخر يسرح بعربية فول او ايس كريم ..والقاشية معدن
عايشين بحرية : ونعم الحرية بنقول اللى عايزينه مع اى حد وفى اى وقت ..الاخوان عايشين فى امان
بيعملوا لقائتهم واجتماعاتهم بمنتهى الحرية
زمن القيود اختفى :حد يدورنا عليه يشوفو راح فين
اتحدى لو واحد يوم انضرب بالقفا :ماحدش بينضرب بالقفا اطلاقا..حتى المساجين فى ابو غريب وغيره
ولا بينضربوا ولا بيتهانوا ..عيشة زى الفل
الناس بتختشى : الحياء مالى الناس ومعمر قلوبهم ..بدليل بنات اليومين دول ماشاء الله عليهم
كلهم حياء وخجل
ولا حد بيرتشى : الرشاوى مش نازله على ودنه ولا غيره
حتى الرشاوى البسيطة اللى بتندفع للموظفين عشان يقضوا مصالح البشر مابقتش موجوده
اختفت تمااااااااااااما
الله على الحياة بقى لونها شفتشى : لون جديد ماحدش شافه قبل كده
وادينا بنشوفه وعايشين بيه

الجزء التانى
متأمنين من الفقر الضنك ..تعليم علاج ..وحساب بالنك
شقق مرمية ..والشغل فى كل حتة ..واللحمة بسبعة جنيه ..وساعات نلاقيها بسته
والكل منتعش والكل منتشى ..الله على الحياه بقى لونها شفتشى
ده احنا لاصوتنا اتنبح ولا فى مالطه بندن

متأمنين من الفقر الضنك: مافيش حد الحمدلله مرتبه (لو حكومى) اقل من ميه واربعين جنيه
يعملوا كتير الميه واربعين فى وقتنا الحالى
تعليم علاج وحساب بالبنك: احسن تعليم ولا مستوى متندى ولا حاجه خالص
العلاج مجانى للفقرا والمحتاجين ..الدكاترة بيراعوا النقطة دى .. ماتلاقيش حد محتاج علاج ومش لاقى
ماتلاقيش حد محتاج يعمل عملية ومش قادر على مصاريفها ..
وكل واحد تلاقى عنده حساب فى البنك يكفيه 3 ايام قدام ..كفاية هنطمع؟؟
شقق مرميه: مش لاقية حد يسكنها ..ماهو طبيعى يعنى مش هتلاقى حد يقدر يدفع ايجارها
الشغل فى كل حتة : خدعوك فقالوا ..الشغل كتير بس انت دور
اللحمة بسبعة جنية وساعات تلاقيها بسته: اكيد اكيد من اللحمة اياها ..ال ستة ال
والكل منتعش: ايوة الكل بينتعش تحت دش المية الساقعه
الله على الحياة بقى لونها شفتشى : نفس اللون رجع تانى ..بكره هيبقى فحلوقى

لنا الله

تصبيره

السلام عليكم ورحمة الله وبركاته

بعد انقطاع النت الى مايقرب من شهرين ..

عاد اليوم بحمد الله

من اليوم بردو ..مش دلوقتى طبعا ..

هرجع امارس هواياتى ونشاطاتى تانى على النت

دى كانت بس تصبيرة صغيره لحين كتابة بوست جديد ان شاء الله