لحد امتى هنفضل كده ؟؟

سلام عليكم
بجد حاجه تغيظ وترفع الضغط ..لحد امتى هنفضل كده ؟؟
المصالح الحكوميه لحد دلوقتى بما فيهم الجامعات مايعرفوش يعنى ايه كمبيوتر
مايعرفوش يعنى ايه داتا بيز ومعلومات واكسيس واكسيل
حاجه تغيظ والله....
لما روحت اطلع شهادة التخرج بتاعتى طلبوامنى وصل المصاريف بتاع سنه اولى
عشان يتأكدوا انى دفعت المصاريف كامله
المهم ماكانش معايا الوصل ...
واللى كانت بتطلعلى الشهاده قالت لى
اطلعى الدور اللى فوقينا نفس الاوضه اللى فوقينا بردو :D
هتلاقى سجلات ..دورى على سجل 2003 -2004
هتلاقى اسمك فيهم ..هاتى بياناتك منه وتعالى ..(:
المهم طلعت لاقيت واحده قاعده قلتلها عاوزة اطلع الشهاده
و وووو وحكيتلها اللى حصل اللى تحت مع الموظفه اللى تحت
قالت لى عندك سجلات كتير هناك ..دورى على السجل اللى انتى عاوزاة
وما ادراكم والبحث عن السجل ...حاجه بجد تخنق
مطلوب منى ادور على سجل فى وسط سجلات منعكشه
مش مرصوصه ومترتبه .. ولا حتى السنوات مكتوبه عليها من الجنب
مكتوبه على وش السجل
وبقى مطلوب منى ابص فى كل السجلات وادور على التاريخ
المشكله مش فى انى ادور على السجل
المشكله ان السجلات مش محطوطه فى رف مثلا ومترتبه
دى محطوطه على مكتب وبردو مش متربته
الفين وخمسه تحت الفين وسبعه وفوقيه الفين واتنين
وحاجه كده زى الفل يعنى ...
المهم خلصنا من رحلة البحث عن السجل المطلوب
مش بقى فاضل غير انى ادور على اسمى ..
تخيلوا معايا كده ..سجل طويل عريض
مطلوب منى ادور فيه على اسمى واطلعه
تخيلوا حد هيدور على اسم فى سجل دفعته وكلية تجاره
متخيلين العدد طبعا .. ماهى اصلها كلية الشعب ..
المهم مسكت السجل وقلت بسم الله
كان معايا قريبتى ..قلنا انجازا للوقت
هدور انا فى الصفحه من فوق وهى تدور من تحت
وكمان بندور واحنا واقفين ..
فضلنا كتير بندور على اسمي ...لحد اما الحمدلله لاقيناه
بعد اما ضهرنا اتقطم ورقبتنا اتلوحت ..
والله حسيت انى دوخت من الوقفه والبحث عن اسمي
كل ده عشان اطلع الشهاده ...
اخدت البيانات اللى جنب اسمى ونزلت بيها تحت
للموظفه الاولانيه ..وبعد كده كل شئ مشي تمام
ولله الحمد والمن والفضل ...
اللى غايظنى فعلا ..ليه مايكونش فى جهاز كمبيوتر تتحط عليه البيانات دى ؟؟
لحد امتى هنفضل كده ؟؟
هنفضل نتعامل بطرق قديمة ومتعبه ..
مش للطلبه بس ..وللموظفين كمان
تخيلوا كده لو كان فى كذا طالب وطالبه من نفس الدفعه
وفى نفس اليوم ..عاوزين يطلعوا شهاداتهم؟؟
كانوا هيوقفونا طوابير ؟؟
وواحد واحد يدور على اسمه ؟؟
ماعتقدش ..موظفين الحكومه خلقهم ضيق
مش بعيد يمشونا ويقولولنا تعالوا بكره ..
او ياخدوا عدد معين والباقى بالسلامه ..
لو كان فى الاختراع اللى بيدعى كمبيوتر ده
كان هيوفر علينا حاجات كتير ومجهود اكتر ..
لكن نقول ايه بقى ؟؟
هنفضل طول عمرنا كده .. متأخرين ..
وطالع عينينا ..
اما نشوف اخرتها
.............................

هكذا يأتينا ..

اشتاق اليهم من وقت ليس بقصير
غابوا عنى كثيرا
لم اكن اعرف سبب غيابهم هذا ..
وجدتنى التقط هاتفى ...واتصل برقمهم
وعندما سمعت صوتهم ..شعرت بألم
هذا ليس صوتهم الذى اعتدت ان اسمعه
اشعر بنبرات حزن فيه ..
وعندما سألت عن السبب
وكان السبب انهم كانوا نائمين
ولكن لم اقتنع ..وسألت سؤالا اخر ..
ماسبب غيبتكم الطويلة تلك ؟؟
صدمنى الرد ..حيث كان
كنا نمر بظروف قاسية ولدينا حالة وفاة
صُدمت فى بادئ الامر وقلت لعله قريب لهم
سألت من ؟؟
اختنق صوتهم بالبكاء ..
واجابوا ..والدى
يا الله يا الله
وقتها لم اتمالك نفسي ولم اشعر بشئ بعدها
سوى بدمعات من عينى تتساقط
انا لله وانا اليه راجعون
انا لله وانا اليه راجعون
انا لله وانا اليه راجعون
اهذا كان سبب غيابكم الطويل ؟؟
لما لم تبلغونى؟؟
شعرت وقتها بتقصيري الشديد نحوهم
حيث انى لم اسأل عنهم غير الان
ويحك يا نفسي ..كم كنتى عليهم قاسيه
اعلم انى بالنسبة لهم ليست مجرد شخصية يعرفونها
وهذا مازادنى الما
فأعرف مكانتى عندهم جيدا
وهم ايضا يعلمون مكانتهم بقلبى
فهم يحتلون مكانه كبيرة به ..
كم تألمت لسماع هذا الخبر المؤلم
كم صدمت منه
هكذا هو الموت
يأتينا بغتة ..دون انذار
يا الله
لم اكن اتوقع هذا ابدا
رحمة الله على والدهم
واسكنه فسيح جناته
والهمهم الصبر والسلوان ..
....................................
الحمدلله
الحمدلله
الحمدلله

21-9-2007

9
رمضان 1428

احنا بندون ليه ؟؟

سلام عليكم

سؤال سألته لنفسى من شويه ...انا بدون ليه ؟؟
مالقتش اجابه بصراحه ..ماعرفش انا بدون ليه ؟؟
احيانا يمكن الواحد يكتب موضوع يفيد غيره او يسيب اثر
او يقول معلومة ..او يقول خبر واحداث من اللى بتحصل دلوقتى
يمكن بعض التدوينات اللى دونتها كنت عاوزة اوصل منها
او بعترض على حاجه مش عجبانى بأسلوب ساخر شويه ..
طب ايه ..؟؟ وبعدين ..؟؟
دونا
وكتبنا
وقلنا اللى نفسنا نقوله
طب وايه كانت النتيجه ؟؟
اول مره احس ان التدوين مالوش لازمه
بغض النظر عن بعض المدونات اللى بتابعها دايما
وبجس انها بتقول حاجه او ليها لازمه
لكن المدونات اللى مالهاش لازمه
مدونيها ..بيدونوا ليه ؟؟
زهق..؟؟؟ يمكن ...!
فضا ...؟؟؟ احتمال ..ليه لأ؟؟
بس بجد يعنى حد سأل نفسه مره انا بدون ليه ؟؟
يمكن السؤال ده طق فى دماغى فجأه نتيجه للحاله النفسيه السيئه اللى بمر بيها
فى لحظه قررت ابعد عن النت وعن التدوين
وحتى كمان عن زعتر ..اللى فعلا لو بعدت عنه يوم
بحس انه فى حاجه غلط فى يومي
بس اذ فجأة كده كنت مقرره القرار ده
وطلع سؤال انا بدون ليه ؟؟
بدخل نت ليه ؟؟
اكيد طبعا بستفيد ..
بتواصل مع البشر
بس ماهو كل ده ممكن يحصل من غير نت ..
مممممممممممممممممممممم
مش عارفه بصراحه ...لسه بدور على اجابة السؤال ده
انا بدخل نت عمتا ليه ؟؟
حد سأل نفسه السؤال ده ولقاله اجابه ؟؟
.................!

واستوظفت يا جدعان

سلام عليكم ورحمة الله وبركاته
من غير لا احم ولا دستور
هوب هوب لاقيتهم بيقولولى تعالى استلمى شغلك يوم السبت
بالرغم من انى معارضى عمل المرأه
وان المرأه ممكن تثبت ذاتها ونفسها فى بيتها
بالعكس وهتتفوق فيه اكتر من العمل خارج المنزل
لكن كان حتما ولا بد انى اجرب الحياه العمليه
لسه مخلصة الكورس النهارده
وبردو روحت قدمت ورقى فى الشغل النهارده
وسبحان الله من غير لا احم ولا دستور
حتى من غير مايخدوا الورق
قالولى خلاص تعالى استلمى شغلك يوم السبت ان شاء الله
ولو تحبى تستلميه دلوقتى اتفضلى (:
:ker: :ker:
طبعا ما استلمتوش النهارده
قلت اخدلى النهارده وبكره نوم عشان مافكرش فيه يومين ولا حاجه
ماكنتش متوقعه اطلاقا انى هنزل شغل على طول كده
سبحان الله
ماشيه بالعكس
الناس اللى هتموت وتشتغل بتتعب لحد اما تلاقى شغل
واللى مش فارق معاهم شغل ..
الشغل بيقولهم شوبيك لوبيك
بعيدا عن انى كنت ناوية ادور على شغل
بس مكانش دلوقتى يعنى
كمان حبة كده قدااااااام
لما اظبط ورقى وحاجاتى
ابقى افكر ادور على شغل
لاقيتنى مره واحده
ومن حيث لا ادرى ولا احتسب
جايلى شغل من صاحبتى
تكلمنى امبارح
هاتى ورقك بكره ..بكره اخر يوم فى تقديم الورق
وهتشتغلى زى مانتى عاوزه
هنقعدك على كمبيوتر
فرحت طبعا ونزلت قدمت الورق
بس اتصدمت لما عرفت انه قطاع حكومى ):
مابفضلوش بصراحه
الخاص احلى ..والتعامل مع الناس بيبقى اسهل بكتير
ماعلينا
اهى تجربه والسلام
اول مره احتك بالعالم الخارجى
واحتك بالناس
اما نشوف ايه اللى هيحصل
يا صابت يا خابت
يا اتنين عور d:
ممممممممممم
مش متفائله بصراحه بالشغل ده
مقلقه جدا
يمكن عشان اول مره انزل اشتغل
ماعلينا
بس اهى تجربه والسلام
عل وعسى تضيف لى خبره
فى مجال العمل
او فى مجال التعامل مع البشر
لعله خير بإذن الله
دعواتكم ماسبش الشغل كمان اسبوع
:d :d :d :d
.............................
update

مش قلتلكم مقلقه
ماكملتش اسبوع اهو
نص يوم وسبت الشغل :d
ورجعت عاطل تانى :d

عيد من غير تاج مايكملشى

سلام عليكم ورحمة الله وبركاته
عدنا بعد رمضان ...لكن عدنا بتاج D:

تاج من الاخت طعــــــــمه

لو قالولك اختار عصر من عصور مصر علشان تعيش فيه تختار أى ‏عصر و فى عهد أى حاكم .. واشمعنى؟

ممممممممممممممم
اى عصر سابق لعصرنا هذا اكيد هو افضل منه بكثير
لكن ممكن نقول العصر الاسلامى او الفاطمى


أول ‏أولويه فى حياتك عيلتك ولا شغلك ولا أصحابك؟
عيلتى اكيد


إيه أكتر ‏حاجه بتحبها في رمضان؟
روحانياته


اوصف ليا ‏أجمل فطار ممكن تفطره
اجمل فطار لما بكون مع اصحابى بره البيت
بيبقى يوم فظيع فعلا ..


لو أنت ‏حاكم على مجموعه من الأفراد هتكون عادل؟؟ طب هتعمل إيه عشان تتأكد إنك حاكم ‏عادل؟
هحاول اكون عادله طبعا
لكن ماقدرش اجزم او ايقن هل هكون عادله ولا لا؟؟
الخطأ وارد جدا حدوثه
هستشير غيرى عشان اتأكد انى عادله ولا لأ؟؟


اللى بيبوظ الحكام .. نفسهم؟ ولا الشعب؟ ‏ولا الحاشيه المقربه؟
كل واحد له دور
الشعب ممكن يفسد الحكام
والحاشيه ايضا
والحكام انفسهم
لكن اغلب من يفسدهم الحاشيه المقربه


مين ‏أكتر إعلامي مصري بتحترمه؟
عمرو اديب


قريت ديوان عمر مصطفى صاحب بلوج تجربه " أسباب وجيهه للفرح" ‏عن دار ملامح و لا لسه ؟؟
احم احم
اول مره اسمع عنه ..


لو ‏ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ‏ايه؟
حاليا بتمنى اشتغل اى شغلانه
بدل مانا قاعده عاطل كده ):


ايه تانى بلد تتمنى تعيش فيها بعد ‏مصر؟
السعوديه وخصوصا مكه المكرمه


اوصف ليا ‏ترتيبات أجمل فرح ممكن تحضره
الافراح كلها بقت شبه بعض
لكن عمتا بقيت احاول ماحضرش افراح بقدر المستطاع


بتراعي ‏كلام الناس والقيل والقال؟ لو اه او لو لا قول لى ‏ليه؟
مش فى كل الاحوال
على حسب...


صحيت من النوم ما لقيتش الموبايل ولا الكمبيوتر ولا ‏الكاميرا الديجيتال ولقيتنا ‏رجعنا لعصر الحمام الزاجل والحصنه هتكون سعيد؟
اه طبعا
هكون سعيده جدا


السعاده ‏هى؟
الرضا بما قدره لنا الله


عندك أمل ‏؟؟ أسبابك
طبعا
تفائلوا خيرا تجدوه
والسبب ان الامل فى ربنا كبير


لما تحب ‏تهرب من كل شئ بتروح فين؟
بقعد فى غرفتى واقفل النور
او اقعد فترات طويله قدام الكمبيوتر


امتى ‏أول مره خدت فيها نفس طويل كده وقلت بينك وبين نفسك يااااه الظاهر انا فعلا ‏كبرت؟
من كم يوم كده
كنت عند خالتو وقاعده مع بنتها
رجعت من السفر ..بقالنا سنه ماشفناش بعض
واحنا بنتكلم قلتلها هييييييييييييه خلاص يابنتى كبرنا


لما ‏بتعمل عمل خيرى بيكون ايه هو دافعك الاول؟
انى اعمل اى شئ يقربنى لربنا


بتشرب ‏سجاير؟ لو الاجابه اه ايه شعورك لو شفت ست بتشرب سجاير؟ وليه ‏؟
لا الحمدلله
لو شفت رجل او امرأة بتشرب سجاير
بشمئز جدا


بتعرف ‏ايدك اليمين من الشمال ازاي؟
من علامة الماوس اللى فى ايدى اليمين
من كتر مابقعد على الكمبيوتر وبمسك الماوس
عمل علامه غامقه فى ايدى D:


ايه اكتر ‏اله موسيقيه بتحبها ؟ ؟
البيانو
كنت بعزف عليه فى المدرسه هو والاوكرديون


فى رأيك ليه الذوق والنخوه ‏اتعدموا؟
عشان ماحدش بقى بيهتم بأى شئ غير بنفسه


ايه ‏الحاجه اللى لو حصلتلك تبقى سعيد قوى؟؟؟
حاجات كتير ممكن تخلينى طايرة من الفرحه
بس اكتر 3 حاجات
ازور بيت الله
احس ان والداى راضيين عنى
اشوف ابتسامة على وش طفل


تختار ‏يبقى عندك...أرض زراعيه ولا أجنس عربيات و لا كام عماره و لا فلوس فى ‏البنك؟؟؟؟
فلوس فى البنك


البحر و ‏لا النيل؟؟؟
اكيد البحر


مركب و ‏لا طياره؟؟
مركب طبعا


مجنون و لا ‏عاقل؟؟
نص نص ..ده رأيي
لكن رأى الناس اختلفت
عائلتى شايفين انى عاقله
اصحابى شايفين انى مجنونه


تقرأ ‏كتاب و لا تتفرج عليه فيلم؟
اتفرج عليه فيلم


أمررة لمين ؟
امنيه ......نويت اكوم مستقبلى
بشمهندس علاء..مش انا
الاخ ياسر سليم ...حياتنا كلمات
انا جعان
جنة ...ماعلينا
just Asmaa
اللؤلؤه ...صدفة فى بحر
لؤلؤة الزمن ...وحدى مع الاخرين
الاخ بيجيرا...صمتا
ليتنى حياة
اللى ماشافش اسمه ياخده بردو D: