منك يا جهازي ..اتخنقت ومليت

سلام عليكم ورحمة الله

اتخنقت من الكمبيوتر فعلا

جبت اخري منه

المشكله مش فيه...

المشكله فى الفيروس اللى كل شويه يهجم عليه

ومايجينيش غير تروجان

يبوظلى الماسينجر ويطيرهولى

ومايشتغلش تانى خالص...

اعمل سكان واموت التروجان...

واقول هيشتغل...

ابدا..

طيب اعمل ريموف للماسينجر وانزله تانى

بردو ابدا ..

حالف مايشتغل..

كل فتره لازم يجيبلى العصبي

مابعرفش اقعد من غير ماسينجر يا ناس ..

مايرضاش يشتغل غير بنسخة ويندوز جديده

يووووووووووووه

هو انا كل اسوبعين تلاته هنزلي نسخه جديده ؟؟

ايه الذل ده ؟؟

بضطر فى حالات الطوارئ

ادخل من سايت خنيييييييييييييق لماسينجر الياهوو

بيخنقنى جدددددددددددددا

لكن مجبر اخاك لا بطل ....

زهقت فعلا من الجهاز العجيب ده ..!

واللى يغيظ اكتر التروجان اللى كل شويتين ينطلي عليه ..

لسه حالا اهوه عامله ريموف ومسطبه الماسينجر تانى...

وبردو بردو بردو..

ماشتغلش...

ومش هنزل نسخة ويندوز تاني..

وان شالله عنى مادخلت ماسينجر

ولا حتى شوفته...

مريض ...بس مالكش علاج عندنا ..!!!!!!

سلام عليكم
كل بوستاتى بقت واخده طابع كئيب ..

ايوة
مريض ومالوش دوا ..
سمعتوها دي قبل كده ؟؟
اديكو سمعتوها
بجد بجد من الحاجات اللى تغيظ وتفرس انه يبقى فى انسان مريض
ومحتاج للدوا ويقولوله لا ..مالكش دوا عندنا ..

الحكايه وما فيها .. من فتره طويله كنت بتابع مرضى فيرس سي ..
علاج الفيرس ده بيبقى حقنه تحت الجلد كل اسبوع لمده سنه كامله ..
ده غير الدوا التاني اللى بيجيبه كل اربع ايام ..والدوا غالى مش رخيص
المشكله مش فى الدوا ...

المشكله فى الحقن ..حقنه بألف وشويه
وواحد مريض مش قادر يجيبها عشان يتعالج ..
جاب جواب من احدى المعاهد الطبيه انه ياخد الحقن على نفقة الدوله
والحمدلله الحكايه نفعت ولمده 3 شهور متتاليين بياخد الحقن
وبيشتري هو الدوا ...

والاسم بيتعالج على نفقة الدوله ..
لا وكمان بيدفع جزء من مصاريف الحقن دي ..
تقريبا 10 % ده غير التحاليل اللى بتتعمل اول بأول ..

خلال الـ3 شهور دول كان كل فتره يروح يعمل تحليل بعيدا عن المعهد
يلاقى انه الحمدلله فى تحسن ملحوظ وواضح
ونسبة الفيرس بتقل من جسمه ..

بعد الـ3 شهور راح يعمل تحليل فى المعهد المذكور
لقى ان نسبة الفيروس عاليه جدا ..وانه بيتحسن ببطء
على عكس كلام التحاليل الاخرى ..

وقالوله فى المعهد فى غيرك اولى ..وممكن يتحسن اسرع منك
كده علاجك عندنا انتهى...نسبة شفائك لم تصل للنسبه المسموح بها
حتى تتم علاجك على نفقة الدوله ...

عمل تحاليل تانيه فى معمل اخر ..نسبه الفيروس طلعت فيها
اقل بكتير جدا جدا جدا عن المذكورة فى تحاليل المعهد

ولازال فى صراع مع المعهد ونتايج التحاليل..
واخر ماتوصل اليه انه يروح معمل تحاليل اخر
ويقارن النتايج ..وايهما ادق واصح ..

اللى غايظنى بجد بجد
ازاى واحد مريض مش قادر يدفع تكاليف علاجه
وفى امكانيه ان الدوله تعالجه على نفقتها
بين لحظه والتانيه يقولوا لا مالكش علاج ؟؟
نسبة الفيرس بتقل ببطء ..؟؟!!!!!!!!!!!!!
على الرغم ان التحاليل الاخرى اثبتت عكس ذلك ..
ويعنى ايه اصلا النسبه بتقل ببطء وغيره اولى ..؟

لا وكمان النظام عندنا كده ..
نظام ؟؟
نظام ايه ده اللى يمنع شخص انه يكمل علاجه بأى حال من الاحوال ؟؟

هو مش الفروض بردو اى حد مايقدرش يعالج نفسه بيتعالج على نفقة الدوله ؟؟
ايا كانت نسبة تأثير العلاج ..المهم انه يتعالج ..ولو على مدار حياته كلها..
ايه المشكله فى كده ؟؟

المشكله ان شاب فى عمر الزهو
عاوز يعيش حياته ويتزوج ويسافر ..
كل ده ممنوع منه ..

ازاى بجد ...
لما فكرت فيها .. وفى كلمة غيره اولى ..
فكرت فى مين ممكن يكون غيره ده ؟؟

حد تبعهم مثلا وهياخد العلاج بأسم الشخص ده ؟؟

طب ليه وقفوا علاجه ؟؟

علامات استفهام كتيره فى الموضوع ده ..

ومش لاقيالها اجابات وتفسير..

لا والله كتر خيرهم ..
عالجوه 3 شهور
وسابوه فى ربع السكه

واللى يغيظ بزياده بقى
انهم بيقولوا اوقف العلاج وتعالى كمان 3 شهور وممكن نجددهولك

ياسبحان الله
مش عارفه بجد ..هما مايعرفوش انه لما يقعد 3 شهور من غير علاج
نسبة الفيروس تزيد فى الجسم ؟؟

حقيقي مش عارفه ..

لا املك سوا الدعاء لهم
والدعاء عليهم ..

وسلملي على النظام...
...